MS Dhoni: టీమ్ ఇండియా మాజీ కెప్టెన్ మహేంద్ర సింగ్ ధోనీ(MS Dhoni), స్టార్ వికెట్ కీపర్ బ్యాటర్ రిషభ్ పంత్ కలిసి ఉన్న ఓ పార్టీ వీడియో ప్రస్తుతం సోషల్ మీడియాలో వైరల్గా మారింది. క్రికెట్ అభిమానులకు ఇద్దరూ ఒకే ఫ్రేమ్లో కనిపించడమే ఆసక్తిని కలిగిస్తే, వీడియోలో ధోనీ చేసిన ఓ కామెంట్ ఇప్పుడు మరింత చర్చకు దారితీసింది.
వైరల్ అవుతున్న వీడియోలో ధోనీ, పంత్తో పాటు కొంతమంది స్నేహితులు కలిసి ఉన్నట్లు కనిపిస్తోంది. అందరూ కలిసి గ్రూప్ ఫొటో దిగిన తర్వాత ధోనీ అక్కడి నుంచి కొద్దిగా పక్కకు వెళ్లినట్లు వీడియోలో కనిపిస్తుంది. మరోవైపు రిషభ్ పంత్ సోఫాలో రిలాక్స్డ్గా కూర్చుని లేదా పడుకుని ఉన్నట్లు కనిపించారు.
Also Read: Hill Deaths: ఐఫోన్ కోసం గొడవ.. ఒకే కుటుంబంలో ముగ్గురు మృతి
ఈ సమయంలో ధోనీ ‘హుక్కా తాగి వస్తా.. ఆగు’ అని చెప్పగా, అందుకు పంత్ ‘నేనూ వస్తా’ అంటూ బదులిచ్చినట్లు వీడియోలోని ఆడియోలో వినిపిస్తోంది. ఈ చిన్న సంభాషణే ఇప్పుడు సోషల్ మీడియాలో వైరల్గా మారింది. ధోనీ సాధారణంగా తన వ్యక్తిగత విషయాలను పెద్దగా బయటకు రానివ్వరు. దీంతో ఆయనకు సంబంధించిన ఇలాంటి వీడియోలు బయటకు వస్తే అభిమానుల్లో ఆసక్తి పెరగడం సహజమే.
వీడియోలో టేబుల్పై బీర్ క్యాన్లు, కాక్టెయిల్స్ వంటి పానీయాలు కూడా కనిపిస్తున్నాయి. పంత్ రిలాక్స్డ్గా కనిపించడంతో కొందరు నెటిజన్లు ఆయన మత్తులో ఉన్నట్లు కామెంట్లు చేస్తున్నారు. అయితే వీడియోలో కనిపించే దృశ్యాలను బట్టి ఒక వ్యక్తి మద్యం సేవించాడని లేదా మత్తులో ఉన్నాడని ఖచ్చితంగా నిర్ధారించలేం.
మరో ముఖ్యమైన విషయం ఏమిటంటే, ఈ పార్టీ ఎప్పుడు, ఎక్కడ జరిగిందనే దానిపై ప్రస్తుతానికి స్పష్టమైన సమాచారం లేదు. అలాగే ఈ వీడియోకు సంబంధించిన పూర్తి సందర్భం కూడా తెలియాల్సి ఉంది. పాత వీడియో తాజాగా వైరల్ అవుతుందా, లేక ఇటీవల జరిగిన పార్టీకే సంబంధించినదా అనే విషయం కూడా క్లారిటీ రావాల్సి ఉంది.
మొత్తానికి ధోనీ, పంత్ అభిమానులకు ఈ వీడియో మాత్రం మంచి ఎంటర్టైన్మెంట్గా మారింది. ముఖ్యంగా ‘హుక్కా తాగి వస్తా’ అంటూ ధోనీ చేసిన కామెంట్, దానికి పంత్ ఇచ్చిన సమాధానం సోషల్ మీడియాలో తెగ వైరల్ అవుతున్నాయి.
Also Read: Arjun AK: కుంటుకుంటూ వచ్చి.. చివరి బంతికి సిక్స్! అసలైన ఆట అంటే ఇదే
