Maruthi Suzuki: ప్రముఖ కార్ల తయారీ సంస్థ Maruti Suzuki అరుదైన మైలురాయిని సాధించింది. 2025–26 ఆర్థిక సంవత్సరంలో కంపెనీ మొత్తం 23.4 లక్షల కార్లను ఉత్పత్తి చేసి రికార్డు సృష్టించింది. ఒక్క ఏడాదిలో ఇంత పెద్ద స్థాయిలో కార్లను తయారు చేసిన సంస్థగా నిలిచిందని SIAM వెల్లడించింది. ప్రపంచవ్యాప్తంగా కూడా ఈ స్థాయి ఉత్పత్తి సామర్థ్యం కొద్దిమంది కంపెనీలకే ఉండగా, మారుతీ సుజుకీ అందులో ఒకటిగా కంపెనీ తెలిపింది.
కంపెనీ మేనేజింగ్ డైరెక్టర్ మరియు సీఈఓ Hisashi Takeuchi మాట్లాడుతూ, ఈ విజయానికి నాలుగు దశాబ్దాలుగా నిర్మించుకున్న బలమైన ఎకోసిస్టమ్, ఉద్యోగులు, డీలర్లు, వెండర్ల సహకారం కారణమని చెప్పారు. ప్రభుత్వ విధానాలు, అలాగే GST 2.0 కూడా కంపెనీ వృద్ధికి తోడ్పడినట్లు ఆయన పేర్కొన్నారు. భవిష్యత్తులో ఉత్పత్తి సామర్థ్యాన్ని 40 లక్షల యూనిట్లకు పెంచి, భారత్ను ఎగుమతుల కేంద్రంగా అభివృద్ధి చేయాలని లక్ష్యంగా పెట్టుకున్నట్లు తెలిపారు.
ప్రస్తుతం కంపెనీ దేశీయంగా 17 మోడళ్లను, 650 వేరియంట్లలో దేశీయ మరియు అంతర్జాతీయ మార్కెట్లలో విక్రయిస్తోంది. హర్యాణాలోని గురుగ్రామ్, మనేసర్, ఖర్కోడా ప్రాంతాల్లో, అలాగే గుజరాత్లోని హన్సల్పూర్లో కంపెనీకి మొత్తం నాలుగు తయారీ ప్లాంట్లు ఉన్నాయి. వీటి వార్షిక ఉత్పత్తి సామర్థ్యం సుమారు 24 లక్షల యూనిట్లు.
ఇంకా, గుజరాత్లోని ఖోరజ్లో మరో కొత్త ప్లాంట్ ఏర్పాటు చేసి, అదనంగా 10 లక్షల యూనిట్ల ఉత్పత్తి సామర్థ్యాన్ని పెంచాలని కంపెనీ ప్రణాళికలు రూపొందిస్తోంది.
గత ఆర్థిక సంవత్సరంలో Dzire, Fronx, Swift, Ertiga, Baleno వంటి మోడళ్లను అత్యధికంగా ఉత్పత్తి చేసినట్లు కంపెనీ తెలిపింది. ఈ మోడళ్లలో ఒక్కోటి 2 లక్షల యూనిట్లకు పైగా తయారైనట్లు వెల్లడించింది.
