Minimun Balance: చాలా మంది ఒకటి కంటే ఎక్కువ బ్యాంక్ ఖాతాలు కలిగి ఉంటారు. అయితే అలా ఉండే సమయంలో ఎక్కువగా ఎదురయ్యే సమస్య మినిమం బ్యాలెన్స్ మెయింటెన్ చేయకపోవడం. ఖాతాలో నిర్దేశించిన కనీస బ్యాలెన్స్ లేకపోతే బ్యాంకులు జరిమానాలు విధించే అవకాశం ఉంటుంది. అందుకే వివిధ ప్రభుత్వ, ప్రైవేట్ బ్యాంకులు నిర్ణయించిన కనీస బ్యాలెన్స్ పరిమితులు గురించి తెలుసుకోవడం మంచిది.
ప్రభుత్వ బ్యాంకుల వివరాలు
స్టేట్ బ్యాంక్ ఆఫ్ ఇండియా (SBI):
దేశంలోనే అతిపెద్ద ప్రభుత్వ బ్యాంక్ అయిన ఎస్‌బీఐలో సాధారణ సేవింగ్స్ ఖాతాలకు కనీస బ్యాలెన్స్ అవసరం లేదు. ఇవి జీరో బ్యాలెన్స్ ఖాతాలుగా ఉండటం ఖాతాదారులకు పెద్ద ఊరటనిస్తుంది.
బ్యాంక్ ఆఫ్ బరోడా:
గ్రామీణ ప్రాంతాల్లో రూ.500, సెమీ-అర్బన్ ప్రాంతాల్లో రూ.1,000, మెట్రో నగరాల్లో రూ.2,000 కనీస బ్యాలెన్స్‌గా ఉంచాలి.
యూనియన్ బ్యాంక్ ఆఫ్ ఇండియా:
కొన్ని ప్రత్యేక ఖాతాల్లో జీరో బ్యాలెన్స్ సౌకర్యం ఉంటుంది. సాధారణ ఖాతాల్లో గ్రామీణ ప్రాంతాల్లో రూ.100 నుంచి రూ.250 వరకు, పట్టణాల్లో రూ.500 నుంచి రూ.1,000 వరకు మినిమం బ్యాలెన్స్ అవసరం.
ఇండియన్ బ్యాంక్:
మెట్రో, పట్టణ ప్రాంతాల్లో నెలకు సగటున రూ.5,000 ఉండాలి. సెమీ-అర్బన్ ప్రాంతాల్లో రూ.2,000, గ్రామీణ ప్రాంతాల్లో రూ.1,000 కనీస బ్యాలెన్స్ అవసరం.
కెనరా బ్యాంక్:
గతంలో గ్రామీణ ప్రాంతాల్లో రూ.500, పట్టణాల్లో రూ.1,000, మెట్రో నగరాల్లో రూ.2,000 కనీస బ్యాలెన్స్ ఉండేది. అయితే ఇప్పుడు ఖాతాలో జీరో బ్యాలెన్స్ ఉన్నా జరిమానా విధించరు.
పంజాబ్ నేషనల్ బ్యాంక్ (PNB):
సాధారణ సేవింగ్స్ ఖాతాల్లో కనీస బ్యాలెన్స్ లేకపోయినా జరిమానా ఉండదు. కానీ ప్రీమియం సేవింగ్స్ లేదా ప్రుడెంట్ స్వీప్ వంటి ప్రత్యేక ఖాతాలకు రూ.5,000 నుంచి రూ.50,000 వరకు బ్యాలెన్స్ అవసరం ఉంటుంది.
ప్రైవేట్ బ్యాంకుల వివరాలు
హెచ్‌డీఎఫ్‌సీ బ్యాంక్:
ఈ బ్యాంక్‌లో సాధారణంగా జీరో బ్యాలెన్స్ ఆప్షన్ ఉండదు. మెట్రో నగరాల్లో సగటున రూ.10,000 మంత్లీ బ్యాలెన్స్ ఉండాలి. గ్రామీణ ప్రాంతాల్లో రూ.2,500 సరిపోతుంది.
యాక్సిస్ బ్యాంక్:
పట్టణ ప్రాంతాల్లో రూ.12,000 వరకు కనీస బ్యాలెన్స్ అవసరం. సెమీ-అర్బన్ ప్రాంతాల్లో రూ.5,000, గ్రామీణ ప్రాంతాల్లో రూ.2,500 ఉండాలి.
ఐసీఐసీఐ బ్యాంక్:
మెట్రో, పట్టణ ప్రాంతాల్లో రూ.10,000, సెమీ-అర్బన్ ప్రాంతాల్లో రూ.5,000, గ్రామీణ ప్రాంతాల్లో రూ.1,000 నుంచి రూ.2,000 వరకు మినిమం బ్యాలెన్స్ అవసరం.
ఐడీఎఫ్‌సీ ఫస్ట్ బ్యాంక్:
ఈ బ్యాంక్‌లో జీరో బ్యాలెన్స్ ఆప్షన్ లేదు. ప్రాంతాన్ని బట్టి రూ.10,000 నుంచి రూ.25,000 వరకు కనీస బ్యాలెన్స్ మెయింటెన్ చేయాలి.
ముఖ్య సూచన
బ్యాంక్ ఖాతా రకం, అలాగే మీరు నివసించే ప్రాంతాన్ని బట్టి మినిమం బ్యాలెన్స్ నిబంధనలు మారవచ్చు. కాబట్టి అనవసరమైన జరిమానాలను తప్పించుకోవాలంటే ఖాతాలో కనీస బ్యాలెన్స్ ఉంచడం మంచిది. ఈ విషయంపై సందేహాలు ఉంటే సంబంధిత బ్యాంక్ సిబ్బందిని సంప్రదించడం ఉత్తమం.
