Hiccups: ఎక్కిళ్లను వైద్య పరిభాషలో “సింగల్టస్” అని అంటారు. మన శరీర నిర్మాణంలో డయాఫ్రాగమ్, ఇంటర్కోస్టల్ కండరాలు ఒక్కసారిగా అసంకల్పితంగా సంకోచించినప్పుడు ఎక్కిళ్లు వస్తాయి. ఆ సమయంలో స్వరపేటిక (వాయిస్ బాక్స్) కూడా వెంటనే మూసుకుపోతుంది. స్వరమడతలు గాలిప్రవాహాన్ని అడ్డుకోవడంతో “హిక్” అనే శబ్దం వినిపిస్తుంది. చిన్నపిల్లల్లో ఎక్కువగా కనిపించినా, పెద్దలకూ ఎక్కిళ్లు వస్తాయి.
చాలా సందర్భాల్లో ఎక్కిళ్లు కొద్దిసేపటికే స్వయంగా తగ్గిపోతాయి. అయితే ఎక్కిళ్లు ఎక్కువసేపు కొనసాగితే, దానికి కారణమైన సమస్యను గుర్తించి చికిత్స తీసుకోవడం మంచిది. అలాగే కొన్ని సులభమైన ఇంటి చిట్కాలతో కూడా ఎక్కిళ్లను తగ్గించుకోవచ్చు.
నాలుకను మెల్లగా లాగడం
ఎక్కిళ్లు ఆగకపోతే నాలుకను మెల్లగా బయటికి చాపి స్వల్పంగా లాగాలి. ఇలా చేయడం వల్ల వేగస్ నాడి ఉత్తేజితమవుతుంది. దాంతో డయాఫ్రాగమ్లోని అసంకల్పిత సంకోచాలు తగ్గే అవకాశం ఉంటుంది. అలాగే డయాఫ్రాగమ్ ప్రాంతంలో స్వల్ప ఒత్తిడి కలిగించడం కూడా సహాయపడుతుంది.
చల్లని నీరు తాగడం
కొద్దిగా చల్లగా ఉన్న నీటిని నెమ్మదిగా తాగాలి. మరీ ఐస్ చల్లగా కాకుండా సాధారణంగా చల్లగా ఉండాలి. చిన్న చిన్న మోతాదుల్లో మెల్లగా తాగితే మంచిది. ఐస్ క్యూబ్ను నోటిలో ఉంచి మెల్లగా పీల్చినా ఉపయోగం ఉంటుంది. ఇది కూడా వేగస్ నాడిని ఉత్తేజితం చేసి ఎక్కిళ్లు తగ్గించడంలో సహాయపడుతుంది.
నిమ్మచెక్క లేదా వెనిగర్
ఎక్కిళ్లు ఆగకపోతే చిన్న నిమ్మచెక్కను కొరికి దాని పులుపును అనుభవించాలి. నిమ్మ అందుబాటులో లేకపోతే ఒక చుక్క వెనిగర్ నోటిలో వేసుకోవచ్చు. ఈ పులుపు రుచి నాడులను ఉత్తేజితం చేసి సమస్యను తగ్గించడంలో సహాయపడుతుంది.
పేపర్ బ్యాగ్లో శ్వాస తీసుకోవడం
ఒక పేపర్ బ్యాగ్ను నోటి దగ్గర ఉంచి లోపలికి బయటికి గాలి పీల్చాలి. ఇలా కొద్దిసేపు చేయడం వల్ల శ్వాసలో మార్పు వచ్చి ఎక్కిళ్లు తగ్గే అవకాశం ఉంటుంది. ప్లాస్టిక్ బ్యాగ్ వాడకూడదు; పేపర్ బ్యాగ్ మాత్రమే ఉపయోగించాలి.
శ్వాసాభ్యాసం
ఎక్కిళ్లు వచ్చినప్పుడు సుమారు 10 సెకన్ల పాటు ఊపిరి బిగపట్టాలి. తర్వాత మెల్లగా వదలాలి. ఐదు అంకెలు లెక్కపెడుతూ గాలిని పీల్చి, అదే విధంగా లెక్కపెడుతూ వదలడం కూడా ప్రయోజనకరం. ఇలా కొన్ని సార్లు చేస్తే ఎక్కిళ్లు తగ్గుతాయి.
కూర్చునే విధానం
నేలపై కూర్చొని మోకాళ్లను మడిచి ఛాతీకి దగ్గరగా తీసుకురావాలి. కొద్దిసేపు ముందుకు వంగి ఆ స్థితిలో ఉండాలి. దీనివల్ల డయాఫ్రాగమ్పై ఒత్తిడి పెరిగి ఎక్కిళ్లు తగ్గుతాయి.
Also Read: Holi Offers: హోలీ ఆఫర్ల పేరుతో లింక్స్.. క్లిక్ చేస్తే ఖాతా ఖాళీ!
Hiccups: ఎక్కిళ్లు ఆగకపోతే ఇలా చేయండి
