Singles: జపాన్లో తగ్గుతున్న జననాల రేటు, మారుతున్న జీవన విధానాలు ప్రభుత్వాన్ని ఆందోళనకు గురిచేస్తున్నాయి. ఈ నేపథ్యంలో, యువతలో పరిచయాలు పెరిగి వివాహాలు జరగాలని లక్ష్యంగా కోచి ప్రిఫెక్చర్ ప్రభుత్వం కొత్త సబ్సిడీ పథకాన్ని ప్రవేశపెట్టింది.
ఈ పథకం ప్రకారం, 20 నుండి 39 సంవత్సరాల మధ్య వయస్సు గల ఒంటరి వ్యక్తులు డేటింగ్ యాప్లు లేదా ఆమోదిత మ్యాచ్మేకింగ్ సేవలు ఉపయోగించేందుకు అయ్యే ఖర్చులపై ఆర్థిక సహాయం పొందవచ్చు. సంవత్సరానికి గరిష్టంగా 20,000 యెన్లు (దాదాపు రూ.12,000) వరకు సబ్సిడీ అందిస్తుంది. ఏప్రిల్ 1, 2026 నుంచి ఈ పథకం అమల్లోకి వచ్చింది.
ప్రవేశ రుసుములు, రిజిస్ట్రేషన్ ఫీజులు, సబ్స్క్రిప్షన్ ఛార్జీలు, నెలవారీ చెల్లింపులు వంటి ఖర్చులను ఈ పథకం ద్వారా తిరిగి పొందవచ్చు. ఈ ఖర్చులు 2026 ఏప్రిల్ 1 నుంచి 2027 మార్చి 10 మధ్య చేసినవే పరిగణనలోకి తీసుకుంటారు. గరిష్ట పరిమితి వరకు పలుమార్లు దరఖాస్తు చేసుకునే అవకాశం కూడా ఉంది.
ఈ పథకం వెనుక ఉద్దేశ్యాన్ని వివరించుతూ అధికారులు, “వివాహం చేసుకోవాలనుకునే యువతకు సహాయం చేసి, వారికి పరిచయాల అవకాశాలు పెంచడం మా లక్ష్యం” అని తెలిపారు.
వ్యక్తులకే కాకుండా, పరిచయ కార్యక్రమాలు నిర్వహించే సంస్థలకు కూడా ప్రభుత్వం మద్దతు ఇస్తోంది. “కొచ్చి ప్రిఫెక్చర్ ఆపర్చునిటీ ఫర్ మీటింగ్ సపోర్ట్ ప్రాజెక్ట్ గ్రాంట్” కింద ఇలాంటి సంస్థలకు సబ్సిడీలు అందజేస్తున్నారు. ఈ సంస్థలు నిర్వహించే కార్యక్రమాల ద్వారా ఒంటరి వ్యక్తులు ఒకరినొకరు కలుసుకునే అవకాశాలు పెరుగుతాయి.
ఈ కార్యక్రమాలను నిర్వహించే సంస్థలకు గరిష్టంగా 1 లక్ష యెన్లు (సుమారు రూ.58,795) వరకు ఆర్థిక సహాయం లభిస్తుంది. కార్యక్రమాల వివరాలు, ఫలితాలపై నివేదిక సమర్పించిన తర్వాత ఈ నిధులను విడుదల చేస్తారు.
జపాన్లో జనాభా తగ్గుదల తీవ్రంగా కొనసాగుతోంది. 2025లో జననాల సంఖ్య 7,05,809కి పడిపోయింది. 1899లో రికార్డులు ప్రారంభమైనప్పటి నుంచి ఇది అత్యల్ప స్థాయి. గత ఏడాదితో పోలిస్తే ఇది 2.1 శాతం తగ్గుదల. వరుసగా ఇది పదవ సంవత్సరం తగ్గుదలగా నమోదైంది.
జపాన్ ప్రపంచంలో అత్యంత వేగంగా వృద్ధాప్య దశలోకి వెళ్తున్న దేశాల్లో ఒకటి. 2024 నాటికి 65 ఏళ్లు దాటిన వారి సంఖ్య 3.62 కోట్లకు చేరుకుంది. ఇది మొత్తం జనాభాలో 29.3 శాతం. ఈ గణాంకాలు దేశం ఎదుర్కొంటున్న జనాభా సమస్యలను స్పష్టంగా చూపిస్తున్నాయి.
పెరుగుతున్న జీవన వ్యయాలు, ఆర్థిక అస్థిరత, మారుతున్న సామాజిక ఆలోచనలు వంటి అంశాలు వివాహాలు, కుటుంబ స్థాపనకు అడ్డంకులుగా మారుతున్నాయి. ఈ పరిస్థితిని మార్చేందుకు పరిచయాలు, వివాహాలను ప్రోత్సహించేలా ఈ కొత్త పథకాన్ని ప్రభుత్వం తీసుకొచ్చింది.
