Chicken: చికెన్ అంటే చాలా మందికి ఇష్టం. ముఖ్యంగా ఆదివారం వచ్చిందంటే ఇంట్లో చికెన్ వంటకాలు ఉండాల్సిందే అని భావించే వారు చాలామంది ఉంటారు. కొందరు వారంలో ఒక్కరోజే తింటే, మరికొందరు వారంలో పలుమార్లు లేదా దాదాపు రోజూ చికెన్ తినడానికి ఇష్టపడతారు. అయితే రోజూ చికెన్ తినడం ఆరోగ్యానికి మంచిదా? కాదా? అనే సందేహం చాలా మందిలో ఉంటుంది. ఈ విషయంపై నిపుణులు ఏమి చెబుతున్నారో చూద్దాం.
రోజూ చికెన్ తింటే వచ్చే ప్రభావాలు
చికెన్‌లో ప్రోటీన్ సమృద్ధిగా ఉంటుంది. ఇది శరీరానికి అవసరమైన పోషకాలను అందిస్తుంది. అయితే అదే సమయంలో కొవ్వు, కేలరీలు కూడా ఉంటాయి. ఒక అధ్యయనం ప్రకారం, తరచూ లేదా రోజూ చికెన్ తినడం వల్ల శరీరంలో కొలెస్ట్రాల్ స్థాయులు పెరిగే అవకాశం ఉంది. దీని వల్ల గుండె జబ్బుల ముప్పు కూడా పెరగవచ్చని నిపుణులు హెచ్చరిస్తున్నారు.
అంతేకాకుండా ఎక్కువ పరిమాణంలో చికెన్ తినడం వల్ల బరువు పెరిగే అవకాశం ఉంది. ముఖ్యంగా ఫ్రై చేసిన లేదా ఎక్కువ మసాలాలతో చేసిన వంటకాలు తీసుకుంటే కేలరీలు మరింతగా పెరుగుతాయి. కొందరికి రోజూ చికెన్ తినడం వల్ల గుండెల్లో మంట, యాసిడిటీ, అజీర్ణం వంటి సమస్యలు కూడా కలగవచ్చు.
ఎంత పరిమాణంలో తినాలి?
బ్రాయిలర్ చికెన్‌లో సాల్మొనెల్లా అనే బాక్టీరియా ఉండే ప్రమాదం ఉందని నిపుణులు చెబుతున్నారు. సరైన విధంగా వండకపోతే ఈ బాక్టీరియా శరీరంలోకి వెళ్లి కడుపు నొప్పి, విరేచనాలు వంటి సమస్యలకు కారణమవుతుంది. అందుకే చికెన్‌ను శుభ్రంగా, పూర్తిగా ఉడికేలా వండడం చాలా ముఖ్యం.
రోజూ చికెన్ తినడం మంచిది కాదని నిపుణులు సూచిస్తున్నారు. తప్పనిసరిగా తినాల్సి వస్తే రోజుకు 100 గ్రాములకంటే ఎక్కువ తీసుకోకూడదని చెబుతున్నారు. అలాగే బ్రాయిలర్ చికెన్ కంటే నాటు కోడి మాంసం కొంత మెరుగైన ఎంపికగా భావిస్తున్నారు.
