Tension: మానసిక ఒత్తిడి మన ఆరోగ్యానికి, ముఖ్యంగా గుండెకు, పెద్ద శత్రువుగా మారుతుందని వైద్యులు చెబుతున్నారు. రోజువారీ జీవితంలో పని ఒత్తిడి, కుటుంబ సమస్యలు, ఆర్థిక భారం, నిద్రలేమి వంటి కారణాల వల్ల చాలా మంది నిరంతరం స్ట్రెస్లో ఉంటున్నారు. ఈ ఒత్తిడి తాత్కాలికంగా మాత్రమే కాకుండా దీర్ఘకాలం కొనసాగితే గుండె సంబంధిత సమస్యలకు కారణమయ్యే ప్రమాదం ఎక్కువగా ఉంటుంది.
మనకు ఒత్తిడి కలిగినప్పుడు మెదడులోని నాడీ వ్యవస్థ వెంటనే స్పందిస్తుంది. దీనివల్ల శరీరం “అలర్ట్ మోడ్”లోకి వెళ్తుంది. ఫలితంగా రక్తపోటు (BP) పెరగడం, గుండె వేగంగా కొట్టుకోవడం జరుగుతుంది. అదే సమయంలో రక్తనాళాలు కుంచించుకుపోవడం వల్ల రక్తప్రసరణ సరిగా జరగదు. ఇలా తరచూ జరిగితే రక్తం గడ్డకట్టే అవకాశం పెరుగుతుంది. ఈ పరిస్థితి తీవ్రమైతే గుండెపోటు వచ్చే ప్రమాదం కూడా పెరుగుతుందని నిపుణులు హెచ్చరిస్తున్నారు.
కాబట్టి గుండె ఆరోగ్యాన్ని కాపాడుకోవాలంటే ఒత్తిడిని తగ్గించడం చాలా అవసరం. ఇందుకోసం ప్రతిరోజూ కొంత సమయం కేటాయించి యోగా, ధ్యానం, శ్వాసాభ్యాసాలు చేయడం మంచిది. అలాగే సరిపడా నిద్రపోవడం, సమతుల ఆహారం తీసుకోవడం, నడక లేదా తేలికపాటి వ్యాయామం చేయడం కూడా ఉపయోగకరం. కుటుంబ సభ్యులతో మాట్లాడటం, మనసుకు నచ్చిన పనులు చేయడం ద్వారా కూడా స్ట్రెస్ తగ్గుతుంది.
