Smoking: ధూమపానం ఆరోగ్యానికి చాలా హానికరం అని అందరికీ తెలిసిందే. అయినప్పటికీ చాలా మంది ఈ అలవాటును మానలేక ఇబ్బంది పడుతుంటారు. ప్రపంచవ్యాప్తంగా ప్రతి ఏడాది సుమారు 70 లక్షల మంది స్మోకింగ్ కారణంగా ప్రాణాలు కోల్పోతున్నారు. అలాగే పాసివ్ స్మోకింగ్ వల్ల మరో 12 లక్షల మంది మరణిస్తున్నారని అంచనాలు చెబుతున్నాయి. ఈ సంఖ్యలు ధూమపానం వల్ల కలిగే ప్రమాదాన్ని స్పష్టంగా తెలియజేస్తున్నాయి. పొగ తాగడం వల్ల గుండె జబ్బులు, డయాబెటిస్, ఊపిరితిత్తుల సమస్యలు, క్యాన్సర్ వంటి ప్రాణాంతక వ్యాధులు వచ్చే ప్రమాదం ఎక్కువగా ఉంటుంది.
అయితే ఈ వ్యసనం నుంచి బయటపడాలని చాలా మందికి కోరిక ఉన్నా, ఎలా మానేయాలో తెలియక కొంతమంది సతమతమవుతుంటారు. సరైన పద్ధతులు పాటిస్తే స్మోకింగ్ అలవాటును క్రమంగా తగ్గించుకోవచ్చు. అయితే ఈ ప్రయత్నాలు చేస్తున్న సమయంలో వైద్యులను సంప్రదించి వారి సూచనలు తీసుకోవడం మంచిది.
స్మోకింగ్ మానేయడానికి కొన్ని మార్గాలు
కోల్డ్ టర్కీ విధానం:
కొంతమంది ఒక్కసారిగా సిగరెట్ తాగడం పూర్తిగా ఆపేస్తారు. దీనిని కోల్డ్ టర్కీ పద్ధతి అంటారు. అంటే ఒకరోజు నిర్ణయం తీసుకుని ఇకపై సిగరెట్ తాగకూడదని పూర్తిగా మానేయడం. కొంతమందికి ఈ విధానం బాగా పనిచేస్తుంది. అయితే ప్రతి ఒక్కరికీ ఇది సులువు కాకపోవచ్చు.
నికోటిన్ రీప్లేస్మెంట్ థెరపీ:
సిగరెట్ తాగాలనిపించడానికి ప్రధాన కారణం అందులో ఉండే నికోటిన్. దీన్ని తగ్గించడానికి మార్కెట్లో నికోటిన్ ప్యాచ్లు, నికోటిన్ గమ్, నాజల్ స్ప్రేలు, ఇన్హేలర్లు లాంటివి అందుబాటులో ఉన్నాయి. సిగరెట్ తాగాలనిపించినప్పుడు వీటిని ఉపయోగించడం ద్వారా క్రమంగా స్మోకింగ్ నుంచి బయటపడే అవకాశం ఉంటుంది. అయితే వీటిని ఉపయోగించే ముందు తప్పనిసరిగా డాక్టర్ను సంప్రదించడం మంచిది.
అలవాట్లలో మార్పులు:
స్మోకింగ్ మానేయాలంటే రోజువారీ అలవాట్లలో కూడా మార్పులు చేసుకోవాలి. ఉదయం టీ లేదా కాఫీ తాగిన వెంటనే సిగరెట్ తాగే అలవాటు ఉంటే దాన్ని మానుకోవాలి. ఆ సమయంలో బిస్కెట్లు, క్యారెట్ ముక్కలు, క్యాండీలు లేదా లాలీపాప్లను తినడం వంటి అలవాట్లు పెట్టుకుంటే సిగరెట్ వైపు మనసు వెళ్లకుండా ఉంటుంది.
వ్యాయామం చేయడం:
నిత్యం వ్యాయామం చేయడం కూడా స్మోకింగ్ తగ్గించడానికి సహాయపడుతుంది. వ్యాయామం చేసినప్పుడు శరీరంలో ఎండార్ఫిన్స్ విడుదలై మనసు ప్రశాంతంగా ఉంటుంది. దీంతో సిగరెట్ తాగాలనే ఆలోచన తగ్గుతుంది. జిమ్కు వెళ్లాల్సిన అవసరం లేదు; సాధారణంగా వాకింగ్ లేదా జాగింగ్ చేసినా సరిపోతుంది.
మనసును ప్రశాంతంగా ఉంచుకోవడం:
చాలా మంది ఒత్తిడిని తగ్గించుకోవడానికి సిగరెట్ తాగుతుంటారు. కానీ ఒత్తిడిని తగ్గించుకోవడానికి మెడిటేషన్, యోగా వంటి మార్గాలు కూడా ఉన్నాయి. అలాగే ఇంట్లో ఉన్న సిగరెట్లు, లైటర్లు, యాష్ట్రేలు వంటి వాటిని పూర్తిగా తొలగిస్తే స్మోకింగ్ అలవాటు తగ్గించుకోవడం సులువవుతుంది.
స్మోకింగ్ మానేయడం ఒక్కరోజులో జరిగే పని కాదు. కొంతమందికి కొన్ని వారాలు, మరికొంతమందికి ఎక్కువ సమయం పట్టవచ్చు. సాధారణంగా ఒక అలవాటు పూర్తిగా మానడానికి సగటున 66 రోజులు పట్టవచ్చని నిపుణులు చెబుతున్నారు. కాబట్టి ఓర్పుతో ప్రయత్నిస్తే ఈ వ్యసనం నుంచి తప్పకుండా బయటపడవచ్చు.
Also Read: Breaking కల్వకుంట్ల కవిత అరెస్టు
Smoking: సిగరెట్ మానేయాలనుందా.. ఈ టిప్స్ ఫాలో అవ్వండి
