Skin Peeling: మన రోజువారీ జీవితంలో చేసే ప్రతి పనిలో చేతులు కీలక పాత్ర పోషిస్తాయి. చేతులు లేకుండా జీవించడం చాలా కష్టం. అందుకే మనం రోజుకు ఎన్నోసార్లు చేతులను ఉపయోగిస్తూ ఉంటాం. అయితే కొన్నిసార్లు అరచేతులు ఎండిపోయి, చర్మం పొట్టు లా ఊడిపోవడం కనిపిస్తుంది. ముఖ్యంగా చిన్నపిల్లల్లో ఈ సమస్య ఎక్కువగా కనిపిస్తుంది. ఇది ఎక్కువ నొప్పి ఇవ్వకపోయినా, కొన్ని రోజులు సరైన జాగ్రత్తలు తీసుకుంటేనే తగ్గుతుంది.
స్కిన్ పీలింగ్ అంటే ఏమిటి?
చర్మం పైభాగంలో ఉండే ఎపిడెర్మిస్ పొర దెబ్బతిన్నప్పుడు అది ఊడిపోవడం స్కిన్ పీలింగ్గా పిలుస్తారు. ఇది శరీరం చర్మాన్ని రక్షించుకునే సహజ ప్రక్రియ. పాత కణాలు తొలగి కొత్త కణాలు ఏర్పడతాయి.
చర్మం పొట్టు ఊడిపోవడానికి కారణాలు
చేతులపై చర్మం ఊడిపోవడానికి అనేక కారణాలు ఉంటాయి. పొడి చర్మం, సన్బర్న్, సోరియాసిస్, అలర్జీలు, సీజనల్ మార్పులు, కెమికల్ ఉన్న సబ్బులు లేదా క్రీములు వాడటం వంటి అంశాలు కారణమవుతాయి. అలాగే బాక్టీరియా లేదా ఇతర ఇన్ఫెక్షన్లు, పోషకాహార లోపం కూడా ఈ సమస్యను పెంచుతాయి. చర్మంపై దద్దుర్లు, దురద, తామర వంటి సమస్యలు కూడా దీనికి కారణమవుతాయి.
పీలింగ్ ఎలా ఉంటుంది?
చర్మం పైపొర సన్నగా పొట్టు లా ఊడిపోతుంది. ఇది సాధారణంగా కనిపించే ప్రక్రియే అయినప్పటికీ, చర్మం ఆరోగ్యానికి ఇది సంకేతం. ఎపిడెర్మిస్ పొర శరీరాన్ని బ్యాక్టీరియా, జెర్మ్స్ నుంచి రక్షించడంలో కీలకంగా ఉంటుంది.
ఈ సమస్యకు పరిష్కారాలు
చర్మం పొడిబారడం వల్ల ఈ సమస్య వస్తే, చేతులను గోరువెచ్చని నీటిలో సుమారు 10 నిమిషాలు నానబెట్టడం మంచిది. దీంతో చర్మం మృదువుగా మారి, పొట్టు తగ్గుతుంది.
విటమిన్-E నూనెతో చేతులకు మసాజ్ చేయడం వల్ల తేమ నిల్వ ఉండి చర్మం మృదువుగా మారుతుంది. అలాగే అలోవెరా జెల్ను చేతులకు రాసి కొద్దిసేపటి తర్వాత కడిగితే ఉపశమనం లభిస్తుంది. అనంతరం కొబ్బరి నూనె రాసుకుంటే ఇంకా మంచిది.
కొబ్బరి నూనెను రోజూ చేతులకు రాసి కొద్దిసేపు మసాజ్ చేస్తే చర్మం తేమగా, మెత్తగా మారుతుంది.
మొత్తం మీద, చేతులపై చర్మం ఊడిపోవడం సాధారణ సమస్యే అయినప్పటికీ, సరైన జాగ్రత్తలు తీసుకుంటే ఇది త్వరగా తగ్గుతుంది. అయితే సమస్య ఎక్కువ రోజులు కొనసాగితే వైద్యులను సంప్రదించడం మంచిది.
Also Read: Black Magic: మీ పరిసరాల్లో ఇలా జరిగితే.. క్షుద్ర పూజలు జరుగుతున్నట్టే..!
Skin Peeling: అరచేతుల్లో చర్మం ఊడిపోతుందా.. ఇలా చేయండి
