Epstein: ప్రపంచ ప్రఖ్యాత భౌతిక శాస్త్రవేత్త, దివంగత స్టీఫెన్ హాకింగ్కు సంబంధించిన కొన్ని ఫోటోలు ఇటీవల సోషల్ మీడియాలో వైరల్ అవుతూ చర్చనీయాంశంగా మారాయి. సంచలనం సృష్టించిన జెఫ్రీ ఎప్స్టీన్ ఫైల్స్లో హాకింగ్ పేరు పలుమార్లు ప్రస్తావనకు రావడం, అలాగే కొన్ని ఫోటోలు బయటపడటంతో నెటిజన్లు వివిధ వ్యాఖ్యలు చేస్తున్నారు. అయితే ఈ అంశంపై హాకింగ్ కుటుంబ సభ్యులు, ప్రతినిధులు స్పందిస్తూ స్పష్టత ఇచ్చారు.
బయటకు వచ్చిన ఫోటోలో స్టీఫెన్ హాకింగ్ ఒక సన్ లౌంజర్పై కూర్చుని, చేతిలో కాక్టెయిల్ పట్టుకుని కనిపిస్తున్నారు. ఆయన పక్కన ఇద్దరు మహిళలు బికినీలలో ఉన్నారు. ఈ ఫోటో 2006లో వర్జిన్ ఐలాండ్స్లోని సెయింట్ థామస్లో జరిగిన ఒక సైన్స్ సింపోజియం సమయంలో తీసినదిగా తెలుస్తోంది. ఆ సందర్భంలో హాకింగ్ క్వాంటం కాస్మోలజీపై ప్రసంగం ఇవ్వడానికి అక్కడికి వెళ్లారు.
ఈ ఫోటోలపై వస్తున్న ఊహాగానాలను హాకింగ్ కుటుంబ ప్రతినిధులు తీవ్రంగా ఖండించారు. ఫోటోలో కనిపిస్తున్న మహిళలు బ్రిటన్కు చెందిన ఆయన దీర్ఘకాలిక వైద్య సంరక్షకులని తెలిపారు. మోటార్ న్యూరాన్ వ్యాధితో బాధపడుతున్న హాకింగ్కు 24 గంటల వైద్య సహాయం అవసరమైందని, అందువల్ల సంరక్షకులు ఎప్పుడూ ఆయనతోనే ఉండేవారని వివరించారు. ఆయన ప్రవర్తనపై వస్తున్న ఆరోపణలు అసంబద్ధమని, అవి కేవలం దుష్ప్రచారమేనని కుటుంబ సభ్యులు స్పష్టం చేశారు.
అమెరికా జస్టిస్ డిపార్ట్మెంట్ విడుదల చేసిన ఎప్స్టీన్ ఫైల్స్లో హాకింగ్ పేరు సుమారు 250 సార్లు ప్రస్తావించబడినట్లు సమాచారం. ప్రధాన నిందితురాలు వర్జీనియా గిఫ్రే గతంలో కొన్ని ఆరోపణలు చేసినప్పటికీ, వాటిని ఎప్స్టీన్ అప్పట్లోనే ఖండించినట్లు చెబుతున్నారు. గిఫ్రే ఆరోపణలు అబద్ధమని నిరూపించిన వారికి నగదు బహుమతి ఇస్తామని ఎప్స్టీన్ తన సహచరురాలు ఘిస్లైన్ మాక్స్వెల్కు పంపిన ఈమెయిల్లో పేర్కొన్నట్లు నివేదికలు సూచిస్తున్నాయి.
2018లో మరణించిన స్టీఫెన్ హాకింగ్ 2006 మార్చిలో ఎప్స్టీన్ నిధులు సమకూర్చిన ఒక శాస్త్రీయ సమావేశానికి హాజరయ్యారు. ఆ సమయంలో సముద్ర గర్భాన్ని ప్రత్యేక సబ్మరైన్లో పర్యటించిన ఫోటోలు కూడా గతంలో బయటపడ్డాయి. అయితే హాకింగ్ ఎప్స్టీన్తో కలిసి ఉన్న నేరపూరిత కార్యకలాపాలకు సంబంధించిన ఎలాంటి స్పష్టమైన ఆధారాలు ఇప్పటివరకు వెలుగులోకి రాలేదు.
శాస్త్ర ప్రపంచంలో విశేష కీర్తి సాధించిన స్టీఫెన్ హాకింగ్ ప్రతిష్టను దెబ్బతీసేలా వస్తున్న వార్తలను ఆయన అభిమానులు, కుటుంబ సభ్యులు ఖండిస్తున్నారు. ఆయన అక్కడికి వెళ్లింది కేవలం శాస్త్రీయ చర్చా కార్యక్రమం కోసమేనని వారు స్పష్టం చేస్తున్నారు.
Stephen Hawking is cited in Epstein files no less than 232 times
The files suggest Hawking had sex with at least one girl and met Epstein personally pic.twitter.com/Uufo4IeGQg
— RT (@RT_com) February 4, 2026
