Viral: కాలం మారుతున్నా కూడా కొందరిలో ఇంకా ఆడపిల్ల పుట్టితే నిరాశ చెందే భావన కనిపిస్తూనే ఉంది. అయితే మరోవైపు, ఆడపిల్ల జన్మిస్తే మహాలక్ష్మి ఇంటికి వచ్చినట్లుగా భావించి ఘనంగా సంబరాలు చేసుకునే కుటుంబాలు కూడా ఉన్నాయి. అలాంటి ఓ ఉదాహరణగా ఛత్తీస్గఢ్లోని ఒక కుటుంబం నిలిచింది.
ధమ్తారి నగరంలోని మాకేశ్వర్ వార్డులో గత 24 ఏళ్లుగా ఆడపిల్ల జన్మించలేదు. ఈ నేపథ్యంలో, రూపేశ్ కోసరియా – కిరణ్ కోసరియా దంపతులకు ఏప్రిల్ 1న బతేనా ఆస్పత్రిలో ఆడబిడ్డ జన్మించడంతో కుటుంబం ఆనందానికి అవధులు లేకుండా పోయాయి. చిన్నారిని ఇంటికి తీసుకువచ్చిన తర్వాత అసలు వేడుకలు ప్రారంభమయ్యాయి.
కుటుంబ సభ్యులు స్వీట్లు పంచిపెట్టడంతో పాటు, వార్డు ప్రజలతో కలిసి డీజేలు పెట్టి డ్యాన్స్లు చేశారు. బాణాసంచా కాల్చుతూ ‘బేటీ ఆయీ హై’ అంటూ ఊరేగింపుగా సంబరాలు జరుపుకున్నారు. ఈ వేడుకలో వార్డు నివాసితులందరూ పాల్గొని దీన్ని ఒక సామూహిక కార్యక్రమంగా మార్చారు.
ఈ సందర్భంగా చిన్నారి కుటుంబ సభ్యులు తమ ఆనందాన్ని పంచుకున్నారు. 24 ఏళ్ల తర్వాత తమ ఇంట్లో ఆడపిల్ల పుట్టిందని చిన్నారి పెదనాన్న దీపక్ తెలిపారు. ఆడపిల్ల కోసం ఎంతోకాలంగా ఎదురుచూశామని చెప్పారు. ఆమెను బాధ్యతతో పెంచుతూ, మంచి విద్య అందిస్తామని స్పష్టం చేశారు. తమ కుటుంబంలో ఆడపిల్ల ఉండటం గర్వకారణమని, అది దేవుడిచ్చిన వరమని భావిస్తున్నామని చెప్పారు.
చిన్నారి మేనత్త సోనియా టాండన్ కూడా ఇదే అభిప్రాయం వ్యక్తం చేస్తూ, ఇంతకాలం తర్వాత పుట్టిన ఈ ఆడబిడ్డ జన్మను ప్రత్యేకంగా జరుపుకోవాలని కుటుంబం నిర్ణయించిందన్నారు. మరో కుటుంబ సభ్యురాలు కంచన్ మిన్పాల్ మాట్లాడుతూ, ప్రతి ఇంట్లో ఆడపిల్ల ఉండాలని, వారు తల్లిదండ్రులకు అండగా నిలుస్తారని అభిప్రాయపడింది. ఆడపిల్లలే ఇంటికి ఆనందాన్ని తీసుకువస్తారని పేర్కొన్నారు.
ఈ వేడుకను చూసిన నగరవాసులు కూడా కోసరియా కుటుంబాన్ని అభినందించారు. ఇలాంటి కార్యక్రమాలు ‘బేటీ బచావో, బేటీ పఢావో’ అనే సందేశాన్ని సమాజంలో మరింత బలంగా చాటి చెబుతాయని అన్నారు. ఈ కుటుంబం ధమ్తారి నగరానికి గౌరవాన్ని తీసుకువచ్చిందని కొనియాడారు.
మొత్తానికి, ఆడపిల్ల పుట్టిన సందర్భంగా నిర్వహించిన ఈ వేడుక కేవలం ఒక కుటుంబ ఆనందాన్ని మాత్రమే కాకుండా, సమాజంలో బాలికల గౌరవం, సమానత్వం గురించి సానుకూల సందేశాన్ని ఇచ్చింది. ధమ్తారిలో జరిగిన ఈ అరుదైన సంబరం ఇప్పుడు అందరి దృష్టిని ఆకర్షిస్తోంది.
Also Read: Youtube: టీవీ యూజర్లకు యూట్యూబ్ షాక్!
Viral: 24 ఏళ్ల తర్వాత ఆడపిల్ల పుట్టిందని..
