Diabetes: ప్రస్తుతం డయాబెటిస్ (మధుమేహం) ప్రపంచవ్యాప్తంగా వేగంగా పెరుగుతున్న ప్రధాన ఆరోగ్య సమస్యగా మారింది. ఇది ఒక దీర్ఘకాలిక వ్యాధి కావడంతో పూర్తిగా నయం చేయడం కష్టమని నిపుణులు చెబుతున్నారు. ఒకసారి డయాబెటిస్ వచ్చిన తర్వాత జీవితాంతం రక్తంలో చక్కెర స్థాయిలను నియంత్రణలో ఉంచుకోవాల్సి ఉంటుంది. అయితే సరైన జీవనశైలి, ఆహారపు అలవాట్లలో మార్పులు చేసుకుంటే ఈ వ్యాధి వచ్చే ప్రమాదాన్ని తగ్గించుకోవచ్చు.
డయాబెటిస్ ఉన్నప్పుడు శరీరం కొన్ని ప్రారంభ హెచ్చరిక లక్షణాలు ఇస్తుంది. ఇవి సాధారణంగా తేలికగా ఉండటంతో చాలామంది పట్టించుకోరు. ముఖ్యంగా చేతులు, కాళ్లలో కనిపించే కొన్ని లక్షణాల ద్వారా ప్రీ-డయాబెటిస్ లేదా డయాబెటిస్ను ముందుగానే గుర్తించే అవకాశం ఉంటుంది.
చేతులు, కాళ్లలో కనిపించే లక్షణాలు
జలదరింపు (Tingling):
చేతులు, కాళ్లలో గుచ్చుతున్నట్టు లేదా జలదరించినట్టు అనిపించడం డయాబెటిస్కు ఒక సంకేతం కావచ్చు. రక్తంలో చక్కెర ఎక్కువగా ఉండటం వల్ల నరాలు, రక్తనాళాలు దెబ్బతిని ఈ సమస్య వస్తుంది.
తిమ్మిరి, దురద:
రక్తంలో షుగర్ స్థాయిలు పెరిగితే చర్మంపై దురద, చేతులు కాళ్లలో తిమ్మిరి కనిపిస్తాయి. ఇది డయాబెటిక్ న్యూరోపతి లక్షణంగా భావించవచ్చు. ఈ పరిస్థితిలో కండరాల నొప్పి, అసౌకర్యం కూడా ఉంటుంది.
పుండ్లు లేదా బొబ్బలు:
చేతులు లేదా పాదాలపై పుండ్లు, బొబ్బలు వస్తే నిర్లక్ష్యం చేయకూడదు. మధుమేహం వల్ల కణజాలాలు దెబ్బతిని ఈ సమస్యలు వస్తాయి. ముఖ్యంగా పాదాల్లో గాయాలు నెమ్మదిగా మానడం కూడా గమనించాల్సిన విషయం.
స్పర్శలో మార్పులు:
నరాలపై ప్రభావం పడటం వల్ల స్పర్శకు సంబంధించి మార్పులు కనిపిస్తాయి. కొన్నిసార్లు సున్నితత్వం తగ్గిపోవడం లేదా అసౌకర్యంగా అనిపించడం జరుగుతుంది. ఇది కూడా డయాబెటిస్ సంకేతంగా ఉండొచ్చు.
కండరాల బలహీనత:
షుగర్ స్థాయిలు ఎక్కువగా ఉంటే కండరాలు బలహీనంగా మారుతాయి. తరచూ ఇలా అనిపిస్తే దీన్ని నిర్లక్ష్యం చేయకుండా పరీక్షలు చేయించుకోవాలి.
పొడి చర్మం, దద్దుర్లు:
డయాబెటిస్ కారణంగా చర్మం పొడిగా మారడం, దద్దుర్లు, మచ్చలు రావడం సాధారణం. ఇవి ఎక్కువ కాలం కొనసాగితే వైద్యులను సంప్రదించడం మంచిది.
ముఖ్య సూచన
ఈ లక్షణాలు ఎక్కువకాలం కొనసాగితే లేదా తరచూ కనిపిస్తే ఆలస్యం చేయకుండా డాక్టర్ను సంప్రదించాలి. సరైన సమయంలో పరీక్షలు చేయించుకొని, చికిత్స ప్రారంభిస్తే డయాబెటిస్ను నియంత్రణలో ఉంచుకోవచ్చు.
