Career: పదో తరగతి లేదా ఇంటర్ పూర్తయ్యాక తర్వాత ఏ కోర్సు ఎంచుకోవాలి, ఏ దారిలో ముందుకు వెళ్లాలి అనే విషయంలో చాలా మంది విద్యార్థులు, వారి తల్లిదండ్రులు సందిగ్ధంలో పడుతుంటారు. భవిష్యత్తుకు సరైన నిర్ణయం తీసుకోవడం ఎంతో కీలకం కావడంతో, ఈ దశలో సరైన మార్గదర్శనం అవసరం అవుతుంది. ఈ సమస్యను దృష్టిలో పెట్టుకుని తెలంగాణ ప్రభుత్వం ప్రత్యేకంగా కెరీర్ గైడెన్స్ టోల్ఫ్రీ సేవను ప్రారంభించింది.
ఈ సేవ ద్వారా విద్యార్థులు తమ ఆసక్తులు, మార్కులు, భవిష్యత్తు లక్ష్యాలను బట్టి ఏ కోర్సులు చదవాలి, ఎలాంటి అవకాశాలు ఉన్నాయో నిపుణుల నుంచి సలహాలు పొందవచ్చు. ఇంజినీరింగ్, మెడిసిన్, డిగ్రీ, పాలిటెక్నిక్, స్కిల్ కోర్సులు లేదా ఇతర వృత్తి విద్యలపై సందేహాలు ఉన్నా ఈ నంబర్కు కాల్ చేసి వివరాలు తెలుసుకోవచ్చు. సరైన సమాచారం లేకపోవడం వల్ల తప్పు కోర్సులు ఎంచుకునే పరిస్థితి రాకుండా ఉండేందుకు ఈ సేవ ఎంతో ఉపయోగపడుతుంది.
విద్యార్థులు లేదా తల్లిదండ్రులు 1800 425 2428 అనే టోల్ఫ్రీ నంబర్కు కాల్ చేసి నిపుణులతో మాట్లాడవచ్చు. ఆదివారం తప్ప ప్రతి రోజు ఉదయం 9 గంటల నుంచి సాయంత్రం 6 గంటల వరకు ఈ సేవలు అందుబాటులో ఉంటాయి. కాల్ చేయడానికి ఎలాంటి ఛార్జీలు ఉండవు.
ప్రత్యేకంగా గ్రామీణ ప్రాంతాల్లో ఉన్న విద్యార్థులకు ఈ సేవ మరింత ఉపయోగకరంగా ఉంటుంది. మంచి కెరీర్ కోసం సరైన మార్గాన్ని ఎంచుకోవాలంటే సందేహాలను వదిలేసి ఈ టోల్ఫ్రీ నంబర్ను ఉపయోగించుకోవాలని విద్యాశాఖ సూచిస్తోంది. సరైన నిర్ణయం తీసుకోవడం ద్వారా విద్యార్థులు తమ భవిష్యత్తును మరింత బలంగా నిర్మించుకోవచ్చు.
