Diabetes Diet: ప్రస్తుత కాలంలో చాలా మందిని వేధిస్తున్న ప్రధాన ఆరోగ్య సమస్యల్లో డయాబెటిస్ (మధుమేహం) ఒకటి. ఒకసారి షుగర్ వ్యాధి వచ్చిన తర్వాత దాన్ని పూర్తిగా నయం చేయడం కష్టం. అయితే సరైన ఆహారం, జీవనశైలితో రక్తంలో చక్కెర స్థాయిలను నియంత్రణలో ఉంచుకోవచ్చు. శారీరక శ్రమ లేకపోవడం, అసమతుల్య ఆహారం తీసుకోవడం వల్ల డయాబెటిస్ వచ్చే ప్రమాదం ఉంటుంది. కొంతమందిలో ఇది వారసత్వంగా కూడా వస్తుంది.
డయాబెటిస్ వచ్చినప్పుడు ప్యాంక్రియాస్ ఇన్సులిన్ అనే హార్మోన్ను తక్కువగా ఉత్పత్తి చేస్తుంది లేదా కొన్ని సందర్భాల్లో పూర్తిగా ఉత్పత్తి చేయకపోవచ్చు. దీంతో రక్తంలో చక్కెర స్థాయిలు పెరుగుతాయి. ఇవి నియంత్రణలో లేకపోతే కిడ్నీలు, గుండె, నరాలు, కళ్లపై ప్రభావం పడే ప్రమాదం ఉంటుంది. అందుకే డయాబెటిస్ ఉన్నవారు తమ ఆహారంపై ప్రత్యేక శ్రద్ధ తీసుకోవాలని నిపుణులు సూచిస్తున్నారు. ముఖ్యంగా ఏ పండ్లు తినాలి, ఏవి తక్కువగా తినాలి అనే విషయాన్ని తెలుసుకోవడం చాలా ముఖ్యం.
డయాబెటిస్ ఉన్నవారు తినవచ్చు అనుకునే పండ్లు
యాపిల్
డయాబెటిస్ ఉన్నవారు రోజుకు ఒక యాపిల్ తింటే ఆరోగ్యానికి మంచిదని నిపుణులు చెబుతున్నారు. యాపిల్లో విటమిన్ C, ఫైబర్, యాంటీ ఆక్సిడెంట్లు సమృద్ధిగా ఉంటాయి. ఇందులో ఉన్న ఫైబర్, పాలిఫినాల్స్ కార్బోహైడ్రేట్ల శోషణను తగ్గించి రక్తంలో చక్కెర స్థాయిలు పెరగకుండా సహాయపడతాయి. యాపిల్ గ్లైసెమిక్ ఇండెక్స్ కూడా తక్కువగా ఉంటుంది. ఇందులోని చక్కెర ఫ్రక్టోజ్ రూపంలో ఉండటంతో రక్తంలో చక్కెర స్థాయిపై ఎక్కువ ప్రభావం చూపదు.
జామకాయ
జామకాయలో ఫైబర్ ఎక్కువగా ఉండటంతో ఇది బ్లడ్ షుగర్ నియంత్రణకు సహాయపడుతుంది. దీని గ్లైసెమిక్ ఇండెక్స్ చాలా తక్కువగా ఉంటుంది. ఇందులో విటమిన్ A, విటమిన్ C, పోటాషియం, యాంటీ ఆక్సిడెంట్లు అధికంగా ఉంటాయి. నేషనల్ ఇన్స్టిట్యూట్ ఆఫ్ హెల్త్ (NIH) ప్రకారం జామకాయ డయాబెటిస్ నియంత్రణలో సహాయపడుతుంది.
కమలపండు
డయాబెటిస్ ఉన్నవారికి కమలపండు కూడా మంచి ఎంపికగా భావిస్తారు. ఇందులో ఫైబర్ అధికంగా ఉండటంతో పాటు గ్లైసెమిక్ ఇండెక్స్ కూడా తక్కువగా ఉంటుంది. కమలలో విటమిన్ C, ఫోలేట్, పోటాషియం వంటి పోషకాలు ఉండి ఆరోగ్యానికి మేలు చేస్తాయి.
కివి
కివి పండులో యాంటీ ఆక్సిడెంట్లు ఎక్కువగా ఉంటాయి. ఇవి గ్లూకోజ్ రక్తంలోకి నెమ్మదిగా విడుదల కావడానికి సహాయపడతాయి. అందువల్ల డయాబెటిస్ ఉన్నవారు దీన్ని మితంగా తీసుకోవచ్చు. సలాడ్లలో కూడా కివిని చేర్చుకోవచ్చు.
డయాబెటిస్ ఉన్నవారు తక్కువగా తీసుకోవాల్సిన పండ్లు
మామిడి
మామిడి పండులో సహజ చక్కెర ఎక్కువగా ఉంటుంది. ఎక్కువగా తీసుకుంటే రక్తంలో చక్కెర స్థాయిలు పెరిగే ప్రమాదం ఉంది. అయితే పూర్తిగా మానేయాల్సిన అవసరం లేదు. మితంగా తీసుకుంటే సరిపోతుంది.
ద్రాక్ష
ద్రాక్ష పండ్లలో కూడా సహజ చక్కెర అధికంగా ఉంటుంది. ఇందులోని ఫ్రక్టోజ్ రక్తంలో చక్కెర స్థాయిలను త్వరగా పెంచే అవకాశం ఉంది. అందువల్ల డయాబెటిస్ ఉన్నవారు వీటిని చాలా తక్కువగా తీసుకోవాలి.
లీచీ
లీచీ పండ్లు ఎక్కువగా తింటే రక్తంలో చక్కెర స్థాయిలు పెరిగే ప్రమాదం ఉంటుంది. కాబట్టి డయాబెటిస్ ఉన్నవారు ఇవి మితంగా మాత్రమే తీసుకోవాలని నిపుణులు సూచిస్తున్నారు.
అరటిపండ్లు
అరటిపండ్లలో చక్కెర శాతం ఎక్కువగా ఉంటుంది. ఫైబర్ ఉన్నప్పటికీ డయాబెటిస్ ఉన్నవారు వీటిని పరిమితంగా తీసుకోవడం మంచిది.
మొత్తంగా చెప్పాలంటే, డయాబెటిస్ ఉన్నవారు పండ్లు పూర్తిగా మానేయాల్సిన అవసరం లేదు. అయితే గ్లైసెమిక్ ఇండెక్స్ తక్కువగా ఉండే పండ్లను ఎంపిక చేసుకుని మితంగా తీసుకోవడం ద్వారా రక్తంలో చక్కెర స్థాయిలను నియంత్రణలో ఉంచుకోవచ్చు. సరైన ఆహారం, వ్యాయామం, వైద్యుల సూచనలు పాటించడం ద్వారా డయాబెటిస్ను సమర్థంగా నియంత్రించుకోవచ్చు.
Also Read: Quiz: క్విజ్లో పాల్గొనండి.. రూ.25వేలు గెలుచుకోండి!
Diabetes Diet: షుగర్ పేషెంట్స్ తినాల్సిన, తినకూడని పండ్లు ఇవే..!
