Jananayagan: తమిళ స్టార్ హీరో విజయ్ నటించిన ‘జననాయగన్’ సినిమా విడుదల వాయిదా పడిన విషయం తెలిసిందే. ఇదే సమయంలో ఈ చిత్రానికి సంబంధించిన సన్నివేశాలు లీక్ అయ్యాయని సోషల్ మీడియాలో ప్రచారం జరుగుతోంది. ఈ ఘటనపై పలువురు సినీ ప్రముఖులు స్పందిస్తుండగా, హీరో విజయ్ దేవరకొండ కూడా తన అభిప్రాయం వ్యక్తం చేశారు.
ఇలాంటి లీక్లు జరగడం చాలా బాధాకరమని ఆయన అన్నారు. తన కెరీర్ ప్రారంభంలో ఇలాంటి పరిస్థితిని తాను ఎదుర్కొన్నానని గుర్తు చేసుకున్నారు. అప్పుడు కలిగిన బాధ, నష్టభావం ఇప్పటికీ మరిచిపోలేనివని తెలిపారు. అలాంటి సందర్భాల్లో మనల్ని ప్రత్యేకంగా లక్ష్యంగా చేసుకున్నట్లు, ఆశలు కోల్పోయినట్లు అనిపిస్తుందని చెప్పారు.
ఇది ఒక్క వ్యక్తి సమస్య మాత్రమే కాదని, ఒక సినిమా కోసం శ్రమించిన నటీనటులు, దర్శకులు, నిర్మాతలు సహా మొత్తం బృందం కలలపై ప్రభావం చూపుతుందని ఆయన పేర్కొన్నారు.
ప్రస్తుతం ఉన్న ఈ సమస్యను వెంటనే పరిష్కరించాల్సిన అవసరం ఉందని, ఈ లీక్లకు కారణమైన వారిని గుర్తించి కఠిన చర్యలు తీసుకోవాలని ఆయన అభిప్రాయపడ్డారు. అలాంటి చర్యలు తీసుకోకపోతే, అది వ్యవస్థలో లోపాలను సూచిస్తుందని అన్నారు.
ఇలాంటి సంఘటనలు మన సమాజంలో కొందరు ఎంత నిర్లక్ష్యంగా ప్రవర్తిస్తారో, ఇతరులకు హాని చేయడంలో ఎంత వరకు దిగజారుతారో చూపిస్తున్నాయని విజయ్ దేవరకొండ వ్యాఖ్యానించారు. చివరగా ‘జననాయగన్’ చిత్ర బృందానికి తన ప్రగాఢ సానుభూతి మరియు పూర్తి మద్దతు తెలుపుతున్నట్లు చెప్పారు.
Also Read: Registration: వాట్సాప్లోనే రిజిస్ట్రేషన్ సర్వీసులు.. ఈ నంబర్ సేవ్ చేసుకోండి!
Jananayagan: ‘జననాయగన్ లీక్’.. ఆ బాధ నేనూ అనుభవించా: రౌడీ హీరో
