Iran Wedding: ఇరాన్లో కొనసాగుతున్న యుద్ధ వాతావరణం మధ్య ఒక జంట చేసిన వివాహం ప్రస్తుతం సోషల్ మీడియాలో విస్తృతంగా చర్చకు దారితీసింది. టెహ్రాన్ సహా పలు నగరాలపై అమెరికా–ఇజ్రాయెల్ దాడులు జరుగుతున్న సమయంలో ఈ జంట అసాధారణంగా వివాహం చేసుకోవడం అందరి దృష్టిని ఆకర్షించింది. సాధారణంగా వివాహాలు అలంకరించిన వేదికలపై జరుగుతాయి. కానీ ఈ జంట మాత్రం సైనిక వాతావరణంలో, మందుగుండు సామగ్రి పెట్టెపై కూర్చుని వివాహం చేసుకున్నారు.
వైరల్ అవుతోన్న ఓ వీడియోలో పెళ్లి జంట తుపాకులు పట్టుకుని కనిపించారు. వారు కూర్చున్న చోట పక్కనే ఒక మెషిన్ గన్ కూడా అమర్చినట్లు కనిపించింది. వారి వెనుక ఆయుధాలతో ఉన్న మద్దతుదారులు నిలబడి ఉండటం కూడా వీడియోలో కనిపించింది. యుద్ధ పరిస్థితుల్లో జరిగిన ఈ వివాహం ఒక ప్రత్యేక దృశ్యంగా మారింది.
ఈ వేడుక రహదారి మధ్యలో సైనిక నేపథ్యంతో జరిగింది. కొందరు దీన్ని యుద్ధ సమయంలో ఇరాన్ నాయకత్వానికి ప్రజలు చూపుతున్న సంఘీభావంగా భావిస్తున్నారు. మరికొందరు మాత్రం ఇది ప్రభుత్వానికి మద్దతు చూపించే ఒక ప్రచార కార్యక్రమంలా కనిపిస్తోందని వ్యాఖ్యానిస్తున్నారు.
ఈ వీడియో సోషల్ మీడియాలో భారీగా వైరల్ అయింది. పలువురు నెటిజన్లు దీనిపై వివిధ రకాలుగా స్పందించారు. ఒకరు “వివాహ కేక్ స్థానంలో మందుగుండు సామగ్రిని ఉంచినట్టుంది. ఇలాంటి పరిస్థితుల్లో కూడా జీవితం ముందుకు సాగుతుంది” అని వ్యాఖ్యానించారు. మరొకరు “మీరు ధైర్యంగా ఉండాలి. పశ్చిమ దేశాలు చేస్తున్న ఈ యుద్ధంలో మీరు గెలవాలని ఆశిస్తున్నాను” అని పేర్కొన్నారు.
ఇదిలా ఉండగా ఫిబ్రవరి 28న అమెరికా మరియు ఇజ్రాయెల్ కలిసి ఇరాన్పై దాడులు ప్రారంభించినట్లు సమాచారం. దానికి ప్రతిగా ఇరాన్ కూడా ప్రతిదాడులకు దిగింది. యునైటెడ్ అరబ్ ఎమిరేట్స్, బహ్రెయిన్, కువైట్, ఖతార్, జోర్డాన్, సౌదీ అరేబియా వంటి దేశాల్లో ఉన్న అమెరికా సైనిక స్థావరాలను లక్ష్యంగా చేసుకుని దాడులు జరిపినట్లు నివేదికలు వెల్లడించాయి.
ఇలాంటి సంఘటనలు యుద్ధ పరిస్థితుల్లో జరగడం ఇదేం మొదటిసారి కాదు. 2024లో రష్యా–ఉక్రెయిన్ యుద్ధ సమయంలో కూడా ఉక్రెయిన్ టెరిటోరియల్ డిఫెన్స్ ఫోర్సెస్కు చెందిన పలువురు సభ్యులు యుద్ధ వాతావరణంలోనే వివాహాలు చేసుకున్నారు. కైవ్ నగరంలో జరిగిన ఒక వివాహంలో ఉక్రేనియన్ డిఫెన్స్ ఫోర్సెస్ సభ్యురాలు లెస్యా ఇవాష్చెంకో, వాలెరీ ఫైలిమోనోవ్తో పెళ్లి చేసుకున్న సందర్భంలో ఆమె సైనిక యూనిఫామ్తో పాటు తెల్లటి ముసుగు ధరించి కనిపించడం అప్పట్లో ప్రపంచవ్యాప్తంగా చర్చనీయాంశమైంది.
ఈ ఘటనలు యుద్ధం మధ్య కూడా జీవితం ఆగిపోదని, కష్టసమయాల్లో కూడా ప్రజలు తమ జీవితాన్ని కొనసాగించడానికి ప్రయత్నిస్తారనే విషయాన్ని గుర్తు చేస్తున్నాయి.
RIFLES IN HAND — Iranian couple celebrate their wedding atop AMMO BOX
Marriage sealed next to a mounted machine gun as armed supporters gather behind them
A symbolic show of support for their government as US-Israeli bombings intensify pic.twitter.com/GDHiNpnGJU
— RT (@RT_com) March 13, 2026
Also Read: War Effect: కళ తప్పిన దుబాయ్.. పర్యాటకులు లేక వెలవెల
Iran Wedding: ఓ పక్క యుద్ధం.. తుపాకులు పట్టుకుని పెళ్లి చేసుకున్నారు
