Adulteration Milk: ఆంధ్రప్రదేశ్లోని రాజమండ్రి (రాజమహేంద్రవరం)లో కల్తీ పాల ఘటన తీవ్ర విషాదాన్ని మిగిల్చింది. ఈ పాలను సేవించిన తర్వాత పలువురు అస్వస్థతకు గురవడంతో స్థానికంగా భయాందోళనలు నెలకొన్నాయి. ఇప్పటివరకు ఐదుగురు ప్రాణాలు కోల్పోయినట్లు సమాచారం, మరో ఎనిమిది మంది ఆసుపత్రిలో చికిత్స పొందుతూ మృత్యువుతో పోరాడుతున్నారు. ఈ సంఘటనతో నగరంలో కలకలం రేగి, ప్రజలు తీవ్ర ఆందోళన వ్యక్తం చేస్తున్నారు.
ప్రాథమిక సమాచారం ప్రకారం, ఈ పాలలో భారీగా కల్తీ చేసినట్లు తెలుస్తోంది. సుమారు 100 లీటర్ల పాలలో అంతే పరిమాణంలో నీరు కలపడంతో పాటు, పాలకు తెల్లటి నురగ వచ్చేలా చేయడానికి దాదాపు 10 కిలోల యూరియా మరియు ఇతర రసాయనాలు కూడా కలిపినట్లు అనుమానాలు వ్యక్తమవుతున్నాయి. ఇలాంటి ప్రమాదకరమైన పదార్థాలు కలిపిన పాలను ప్రజలకు విక్రయించడం వల్లే ఈ విషాదం చోటుచేసుకున్నదని భావిస్తున్నారు.
ఇక ఈ కల్తీ పాల దందా రాజమండ్రితో మాత్రమే పరిమితం కాకుండా సమీప ప్రాంతాల్లో కూడా కొనసాగుతోందన్న వార్తలు వినిపిస్తున్నాయి. దీంతో ప్రజలు మరింత భయాందోళనకు గురవుతున్నారు. వెంటనే ఈ వ్యవహారంపై పూర్తిస్థాయి దర్యాప్తు చేపట్టి, బాధ్యులపై కఠిన చర్యలు తీసుకోవాలని స్థానికులు ఫుడ్ సేఫ్టీ అధికారులను డిమాండ్ చేస్తున్నారు.
రాజమహేంద్రవరంలో జరిగిన ఈ ఘటన కల్తీ ఆహార పదార్థాల ప్రమాదాన్ని మరోసారి గుర్తు చేసింది. అసలు ఏమి జరిగింది, ఎందుకు ఇంతమంది ఒక్కసారిగా అస్వస్థతకు గురయ్యారు, ఈ కల్తీ సరఫరా ఎంత విస్తృతంగా ఉంది అనే అంశాలపై అధికారులు స్పష్టత ఇవ్వాల్సిన అవసరం ఉందని ప్రజలు కోరుతున్నారు.
Also Read: Sai Pallavi: విజయ్ సేతుపతి, సాయి పల్లవి క్రేజీ కాంబో!
Adulteration Milk: 100 లీ. పాలలో 100 లీ. నీరు, 10 కేజీల యూరియా?
