T20 World Cup 2026: ఐసీసీ టీ20 ప్రపంచకప్ 2026లో ఇంగ్లండ్కు ఊహించని పరాజయం ఎదురైంది. గ్రూప్-సీలో భాగంగా బుధవారం వాంఖడే స్టేడియం వేదికగా వెస్టిండీస్తో జరిగిన మ్యాచ్లో ఇంగ్లండ్ సమష్టిగా విఫలమై 30 పరుగుల తేడాతో ఓడిపోయింది. ఈ ఓటమితో సూపర్-8 దశకు చేరుకునే అవకాశాలను ఇంగ్లండ్ మరింత క్లిష్టం చేసుకోగా, వెస్టిండీస్ తమ స్థితిని మెరుగుపరుచుకుంది.
ఈ మ్యాచ్లో ముందుగా బ్యాటింగ్ చేసిన వెస్టిండీస్ నిర్ణీత 20 ఓవర్లలో 6 వికెట్లు కోల్పోయి 196 పరుగుల భారీ స్కోర్ నమోదు చేసింది. షెర్ఫెన్ రూథర్ఫోర్డ్ అద్భుతంగా ఆడి 42 బంతుల్లో 2 ఫోర్లు, 7 సిక్సులతో 76 పరుగులు చేసి అజేయంగా నిలిచాడు. అతడికి జాసన్ హోల్డర్ మంచి మద్దతు ఇచ్చాడు. హోల్డర్ 17 బంతుల్లో ఒక ఫోర్, 4 సిక్సులతో 33 పరుగులు చేసి వేగంగా రాణించాడు. ఇంగ్లండ్ బౌలర్లలో జేమీ ఓవర్టన్, ఆదిల్ రషీద్ తలో రెండు వికెట్లు తీయగా, జోఫ్రా ఆర్చర్, సామ్ కరణ్ ఒక్కో వికెట్ సాధించారు.
అనంతరం 197 పరుగుల లక్ష్యంతో బరిలోకి దిగిన ఇంగ్లండ్కు ఆశించిన ఆరంభం దక్కలేదు. దూకుడుగా ఆడే ప్రయత్నంలో ఓపెనర్ ఫిల్ సాల్ట్ పవర్ప్లేలోనే ఔటయ్యాడు. అయితే జాకోబ్ బెతెల్ దూకుడుగా బ్యాటింగ్ చేయడంతో పవర్ప్లే ముగిసే సరికి ఇంగ్లండ్ ఒక వికెట్ నష్టానికి 67 పరుగులు చేసింది. ఆ తర్వాత వరుసగా జోస్ బట్లర్ (21), టామ్ బాంటన్ (2), జాకోబ్ బెతెల్ వెనుదిరగడంతో ఇంగ్లండ్ ఇన్నింగ్స్ కుదేలైంది.
ఈ దశలో వెస్టిండీస్ స్పిన్నర్ గుడాకేష్ మోతీ మ్యాచ్ను పూర్తిగా మలుపు తిప్పాడు. అతడు కీలక సమయంలో వికెట్లు తీసి ఇంగ్లండ్ పతనాన్ని శాసించాడు. కెప్టెన్ హ్యారీ బ్రూక్ (17)ను కూడా పెవిలియన్కు పంపించాడు. విల్ జాక్స్ (2) విఫలమయ్యాడు. బౌండరీ లైన్ వద్ద రోవ్మెన్ పోవెల్ అద్భుతమైన క్యాచ్తో జేమీ ఓవర్టన్ (5)ను ఔట్ చేశాడు. జోఫ్రా ఆర్చర్ (6) అనవసర పరుగుకు ప్రయత్నించి రనౌట్గా వెనుదిరిగాడు.
ఒకవైపు వికెట్లు పడుతూనే ఉన్నా, మరోవైపు సామ్ కరణ్ ఒంటరి పోరాటం చేశాడు. అతడు 30 బంతుల్లో 3 ఫోర్లు, 2 సిక్సులతో 43 పరుగులు చేసి అజేయంగా నిలిచాడు. కానీ అతడికి సరైన మద్దతు లభించలేదు. లియమ్ డాసన్ (1) రనౌట్గా వెనుదిరగగా, ఆదిల్ రషీద్ క్యాచ్ ఔటయ్యాడు. చివరికి ఇంగ్లండ్ 19 ఓవర్లలో 166 పరుగులకే ఆలౌటై 30 పరుగుల తేడాతో ఘోర పరాజయాన్ని మూటగట్టుకుంది.
వెస్టిండీస్ బౌలర్లలో గుడాకేష్ మోతీ 3/33తో మూడు వికెట్లు తీసి హీరోగా నిలిచాడు. రోస్టన్ ఛేజ్ 2/29తో రెండు వికెట్లు పడగొట్టగా, అకీల్ హొస్సేన్, రొమారియో షెఫెర్డ్, షమార్ జోసెఫ్ తలో వికెట్ సాధించారు. ఈ విజయంతో వెస్టిండీస్ సూపర్-8 దిశగా కీలక అడుగు వేసింది.
