Monalisa: ‘మహకుంభ్’ సమయంలో వైరల్గా మారిన మోనాలిసా వివాహం ఇప్పుడు కొత్త మలుపు తిరిగింది. ఆమెను వివాహం చేసుకున్న ఫర్మాన్ ఖాన్పై పోక్సో చట్టం కింద కేసు నమోదు కావడం సంచలనంగా మారింది. దీనికి ప్రధాన కారణం మోనాలిసా మైనర్ అని అధికారికంగా తేలడమే.
జాతీయ షెడ్యూల్డ్ తెగల కమిషన్ (NCST) ఈ అంశంపై విచారణ చేపట్టగా, మోనాలిసా పెళ్లి సమయంలో ఆమె వయసు కేవలం 16 సంవత్సరాలు, 2 నెలలు, 12 రోజులు మాత్రమే అని నిర్ధారించింది. ప్రభుత్వ ఆసుపత్రి రికార్డుల ప్రకారం ఆమె జననం 2009 డిసెంబర్ 30న సాయంత్రం 5.50 గంటలకు జరిగింది. కాగా, 2026 మార్చి 11న ఫర్మాన్ ఖాన్తో ఆమె వివాహం జరిగింది. అప్పుడు ఆమె మైనర్గానే ఉన్నట్లు తేలింది.
కమిషన్ వెల్లడించిన వివరాల ప్రకారం, తప్పుడు పుట్టిన తేదీ ఆధారంగా ఈ వివాహం జరిగినట్లు గుర్తించారు. అందువల్ల మధ్యప్రదేశ్లోని మహేశ్వర్ మున్సిపాలిటీ జారీ చేసిన పుట్టిన తేదీ సర్టిఫికేట్ను రద్దు చేయాలని ఆదేశించారు. మోనాలిసా షెడ్యూల్డ్ ట్రైబ్ వర్గానికి చెందినదని కూడా కమిషన్ తెలిపింది.
ఈ నివేదిక ఆధారంగా మధ్యప్రదేశ్లోని ఖర్గోన్ జిల్లా మహేశ్వర్ పోలీస్ స్టేషన్లో ఫర్మాన్ ఖాన్పై పోక్సో చట్టం కింద కేసు నమోదు చేశారు. అదనంగా, మోనాలిసా షెడ్యూల్డ్ ట్రైబ్ వర్గానికి చెందినది కావడంతో బీఎన్ఎస్, అట్రాసిటీ చట్టాల కింద కూడా కేసులు నమోదు చేశారు. అక్రమ వివాహానికి సంబంధించిన ఇతర చట్టాల ప్రకారం కూడా చర్యలు తీసుకునే అవకాశం ఉంది.
మోనాలిసా, ఫర్మాన్ ఖాన్లు కేరళలోని తిరువనంతపురం సమీపంలోని పూవార్లో ఉన్న అరుమానూర్ శ్రీ నైనార్ దేవాలయంలో వివాహం చేసుకున్నారు. ఈ మతాంతర వివాహానికి కేరళకు చెందిన కొన్ని ప్రముఖులు కూడా హాజరయ్యారు.
ఇండోర్కు చెందిన మోనాలిసా, సుమారు ఆరు నెలల క్రితం ఫర్మాన్ ఖాన్ను కలిసింది. వీరిద్దరూ వేర్వేరు మతాలకు చెందినవారు కావడంతో కుటుంబాలు ఈ వివాహానికి అంగీకరించలేదు. దీంతో వారు ఇంటి నుండి వెళ్లిపోయి హిందూ సంప్రదాయాల ప్రకారం వివాహం చేసుకున్నారు.
ఈ వివాహం దేశవ్యాప్తంగా చర్చనీయాంశంగా మారింది. ‘లవ్ జిహాద్’ ఆరోపణలు కూడా వినిపించాయి. అయితే, మొదట మోనాలిసానే తనకు ప్రపోజ్ చేసిందని, తాను మొదట నిరాకరించినా తర్వాత ప్రేమించానని ఫర్మాన్ ఖాన్ చెప్పడం గమనార్హం.
