DMart Business: భారత్లో మధ్యతరగతి, పేద కుటుంబాలకు అత్యంత ఇష్టమైన షాపింగ్ కేంద్రాల్లో డీమార్ట్ (DMart) ఒకటి. మార్కెట్లో రూ.149 ఉన్న వస్తువు ఇక్కడ రూ.99కే దొరకడం చూసి చాలామందికి ఆశ్చర్యం కలుగుతుంది. దీనికి వెనుక ఏదో మాయ ఉందని అనిపించినా, వాస్తవానికి ఇది బలమైన వ్యాపార వ్యూహాల ఫలితం.
డీమార్ట్ విజయానికి ప్రధాన కారణం “తక్కువ లాభం – ఎక్కువ అమ్మకాలు” అనే సూత్రం. ఇతర దుకాణాలు ఒక వస్తువుపై ఎక్కువ లాభం ఆశిస్తే, డీమార్ట్ మాత్రం తక్కువ లాభంతోనే అమ్ముతుంది. ఉదాహరణకు, ఒక బిస్కెట్ ప్యాకెట్పై ఇతర షాపులు రూ.10 లాభం చూస్తే, డీమార్ట్ కేవలం రూ.2 లాభంతో విక్రయిస్తుంది. తక్కువ ధరల వల్ల ఎక్కువ మంది కస్టమర్లు ఆకర్షితులై, మొత్తం అమ్మకాలు పెరిగి కంపెనీకి పెద్ద లాభాలు వస్తాయి.
సరఫరాదారులతో ఉన్న సంబంధాలు కూడా డీమార్ట్కు బాగా సహాయపడుతున్నాయి. సాధారణంగా రిటైల్ సంస్థలు సరఫరాదారులకు చెల్లింపులు ఆలస్యంగా చేస్తాయి. కానీ డీమార్ట్ మాత్రం బిల్లులను త్వరగా క్లియర్ చేస్తుంది. దీనివల్ల సరఫరాదారులు తక్కువ ధరలకు సరుకులు ఇవ్వడానికి సిద్ధపడతారు. అలాగే ఒకేసారి భారీగా కొనుగోలు చేయడం వల్ల కూడా కంపెనీకి అదనపు డిస్కౌంట్లు లభిస్తాయి.
ఖర్చులను అదుపులో ఉంచడం కూడా డీమార్ట్ ప్రత్యేకత. చాలా స్టోర్లను అద్దె భవనాల్లో కాకుండా సొంత స్థలాల్లో నిర్మించడం వల్ల అద్దె భారాన్ని తగ్గిస్తుంది. ఖరీదైన డెకరేషన్, లైటింగ్, మ్యూజిక్ వంటి అవసరం లేని ఖర్చులను తగ్గిస్తుంది. ఈ విధంగా ఆదా చేసిన డబ్బును కస్టమర్లకు డిస్కౌంట్ల రూపంలో తిరిగి ఇస్తుంది.
ఇంకా డీమార్ట్ ప్రధానంగా నిత్యావసర వస్తువులపైనే దృష్టి పెడుతుంది. కిరాణా సరుకులు, పప్పులు, నూనెలు, సబ్బులు వంటి వస్తువులు వేగంగా అమ్ముడవుతాయి. వీటిని ఫాస్ట్ మూవింగ్ గూడ్స్ అంటారు. దీంతో స్టాక్ నిల్వలు ఎక్కువ కాలం నిల్వ ఉండవు, పెట్టుబడి త్వరగా తిరిగి వస్తుంది.
డీమార్ట్ విజయానికి సంస్థ వ్యవస్థాపకుడు రాధాకిషన్ దమాని కీలక పాత్ర పోషించారు. స్టాక్ మార్కెట్లో సంపాదించిన అనుభవాన్ని రిటైల్ రంగంలో వినియోగించి, అనవసర ఆర్భాటాలకు దూరంగా ఉండి స్థిరమైన వృద్ధిని సాధించారు. ఈ వ్యూహాల వల్లే డీమార్ట్ దేశంలో ప్రముఖ రిటైల్ బ్రాండ్గా నిలిచింది.
Also Read: No Rains: ఈ ఊర్లో వర్షమే కురవదు!
DMart Business: డీమార్ట్లో ధరలు తక్కువగా ఎందుకుంటాయంటే..
