AP Super Six Schemes: ఆంధ్రప్రదేశ్ లో తెలుగు దేశం పార్టీ అధికారంలోకి వచ్చిన తర్వాత అనేక ప్రజా సంక్షేమం, మహిళా సాధికారత, రైతాంగ సంక్షేమం, యువతకు ఉపాధి కల్పన లక్ష్యాలుగా అనేక హామీలు అమలవుతున్నాయి. వాటన్నింటి సమాహారమే “సూపర్ సిక్స్” (Super Six Schemes). రాష్ట్ర ప్రజల సంక్షేమమే ధ్యేయంగా ప్రభుత్వం అనేక వినూత్న కార్యక్రమాలకు శ్రీకారం చుడుతోంది. మరి ఈ సూపర్ సిక్స్ లో భాగంగా అమలవుతోన్న ప్రధాన పథకాలు, వాటి లక్ష్యాలు, ప్రస్తుత అమలు తీరుకు సంబంధించిన వివరాలను ఇప్పుడు తెలుసుకుందాం.
1. తల్లికి వందనం (Talliki Vandanam):
రాష్ట్రంలోని ఓ ఒక్క చిన్నారీ చదువుకు దూరం కాకూడదనే ఉద్దేశంతో ప్రతి విద్యార్థికి ఏడాదికి రూ.15,000 ఆర్థిక సాయం అందించడం ఈ హామీ లక్ష్యం.
ప్రస్తుత అమలు:
గతంలో ఒక ఇంట్లో ఒకరికే పరిమితమైన నిబంధనను సవరించి, ఇంట్లో ఎంతమంది పిల్లలు బడికి లేదా కళాశాలకు వెళ్తున్నా అందరికీ ఈ పథకాన్ని వర్తింపజేస్తున్నారు. కోట్లాది రూపాయల బడ్జెట్ కేటాయింపులతో పాఠశాల విద్యాశాఖ ద్వారా లబ్ధిదారుల డేటాను పరిశీలించి ఖాతాల్లో నేరుగా జమ చేస్తున్నారు. ఇది నిజంగా చెప్పుకోదగిన విషయం.
2. దీపం 2.0 పథకం (Deepam 2.0 – Free LPG Cylinders):
పేద, దిగువ మధ్యతరగతి కుటుంబాలకు ఆర్థిక భారం తగ్గించేందుకు ఏడాదికి 3 ఉచిత ఎల్పీజీ (LPG) గ్యాస్ సిలిండర్లు సరఫరా చేయడం ఈ పథకం లక్ష్యం.
ప్రస్తుత అమలు:
ఈ పథకం రాష్ట్రవ్యాప్తంగా ఇప్పటికే విజయవంతంగా అమలవుతోంది. కోట్ల మంది లబ్ధిదారులకు ఉచిత గ్యాస్ సిలిండర్ల సబ్సిడీ సొమ్మును ప్రభుత్వం నేరుగా డీబీటీ (DBT) ద్వారా వినియోగదారుల బ్యాంకు ఖాతాల్లో జమ చేస్తోంది.
3. అన్నదాత సుఖీభవ (Annadata Sukhibhava):
రైతుల పెట్టుబడి రక్షణ కోసం ప్రతి రైతు కుటుంబానికి ఏడాదికి రూ.20,000 ఆర్థిక సహాయం అందించడం ఈ పథకం లక్ష్యం.
ప్రస్తుత అమలు:
రాష్ట్ర ప్రభుత్వం ఈ పథకాన్ని .. కేంద్ర ప్రభుత్వ ‘పీఎం కిసాన్’ (PM-Kisan) సాయంతో అనుసంధానించింది. మిగిలిన నిధులను ప్రభుత్వమే జోడించి రైతులకు విడతల వారీగా పెట్టుబడి సాయం విడుదల చేస్తోంది. ఈ పథకం ద్వారా వ్యవసాయ పెట్టుబడులకు సమయానికి నిధులు అందుతున్నాయి.
4. స్త్రీశక్తి – ఉచిత ఆర్టీసీ బస్సు ప్రయాణం (Free Bus Travel for Women):
మహిళలకు సురక్షితమైన, ఉచిత రవాణా సౌకర్యం కల్పిస్తూ ప్రభుత్వం మరో ముందడుగు వేసింది.
ప్రస్తుత అమలు:
ఏపీఎస్ఆర్టీసీ (APSRTC) పల్లెవెలుగు, అల్ట్రా డీలక్స్ బస్సుల్లో మహిళలకు ఉచిత ప్రయాణ సదుపాయం కల్పిస్తోంది. దీనికి సంబంధించి ఆర్టీసీకి అయ్యే వ్యయాన్ని ప్రభుత్వం బడ్జెట్ కేటాయింపుల ద్వారా భరిస్తోంది.
5. ఆడబిడ్డ నిధి (Aadabidda Nidhi):
18 నుండి 59 సంవత్సరాల వయస్సు ఉన్న అర్హులైన ప్రతి మహిళకు నెలకు రూ.1,500 చొప్పున ఆర్థిక స్వావలంబన సాయం అందిస్తున్నారు.
ప్రస్తుత అమలు:
ఈ పథకం అమలుకు సంబంధించి లబ్ధిదారుల ఎంపిక, డేటా వెరిఫికేషన్ ప్రక్రియ కొనసాగుతోంది. త్వరలోనే అర్హులైన ప్రతి మహిళ ఖాతాలో నేరుగా నిధులు జమ చేసేందుకు ఆర్థిక శాఖ సన్నాహాలు చేస్తోంది.
6. యువగళం – నిరుద్యోగ భృతి & 20 లక్షల ఉద్యోగాలు:
రాష్ట్రంలోని యువతకు 20 లక్షల ఉద్యోగ/ఉపాధి అవకాశాలు కల్పించడం లేదా అర్హులైన నిరుద్యోగులకు నెలకు రూ.3,000 నిరుద్యోగ భృతి అందించడం దీని లక్ష్యం.
ప్రస్తుత అమలు:
ప్రభుత్వ రంగంలో ఖాళీల భర్తీ కోసం మెగా డీఎస్సీ (Mega DSC) వంటి నోటిఫికేషన్లు విడుదల చేయడంతో పాటు, పరిశ్రమలు, ఐటీ రంగాల ద్వారా ప్రైవేటు ఉద్యోగాల కల్పన వేగవంతం చేస్తున్నారు.
నైపుణ్యాభివృద్ధి (Skill Development) శిక్షణ ద్వారా యువతకు ఉద్యోగ అవకాశాలు మెరుగుపరుస్తున్నారు.
పింఛన్ల పెంపు (NTR Bharosa Pensions)
సూపర్ సిక్స్ పథకాలతో పాటు ప్రభుత్వం అధికారం చేపట్టిన మొదటి రోజుల్లోనే వృద్ధులు, వితంతువుల పింఛన్లను రూ.3,000 నుండి రూ.4,000కు, దివ్యాంగులకు రూ.6,000 నుండి రూ.15,000 వరకు పెంచి “ఎన్టీఆర్ భరోసా” పేరుతో ప్రతినెలా 1వ తేదీనే అందిస్తుండటం విశేషం.
ఫైనల్ చెప్పాలంటే సూపర్ సిక్స్ పథకాలు కేవలం ఎన్నికల హామీలుగానే మిగిలిపోకుండా, పారదర్శకమైన డిజిటల్ పద్ధతుల ద్వారా ఏపీ రాష్ట్ర ప్రభుత్వం నేరుగా ప్రజల వద్దకు చేర్చుతోంది. ఇవి రాష్ట్రంలోని సకల జనుల జీవితాల్లో ఆర్థిక భరోసానిస్తూ, ఏపీ సంక్షేమ ప్రస్థానంలో కీలక పాత్ర పోషిస్తున్నాయి.
Also Read: CIBIL Score: లోన్ త్వరగా రావాలంటే.. సిబిల్ స్కోర్ ఎంతుండాలి..?
