Condom Shortage: పశ్చిమ ఆసియాలో కొనసాగుతున్న యుద్ధం ప్రభావం ప్రపంచవ్యాప్తంగా సప్లైపై పడుతోంది. ఈ ప్రభావం భారత్లోని గర్భనిరోధక సాధనాల తయారీ రంగంపైనా తీవ్రంగా కనిపిస్తోంది. ముఖ్యంగా కండోమ్ తయారీకి అవసరమైన కీలక ముడి పదార్థాల కొరత, ధరల పెరుగుదల కారణంగా ఉత్పత్తిలో అంతరాయాలు ఏర్పడుతున్నాయి. దీంతో భవిష్యత్తులో కండోమ్ ధరలు పెరిగే అవకాశం ఉందని పరిశ్రమ వర్గాలు చెబుతున్నాయి.
HLL Lifecare, Mankind Pharma, Cupid వంటి ప్రముఖ కంపెనీలు సిలికాన్ ఆయిల్ (PDMS) కొరత, అలాగే అమ్మోనియా ధరల పెరుగుదలతో ఇబ్బందులు ఎదుర్కొంటున్నాయి. కండోమ్ తయారీలో అమ్మోనియా కీలక పాత్ర పోషిస్తుంది. ఇది రబ్బరు పాలను నిల్వ ఉంచేటప్పుడు గడ్డకట్టకుండా కాపాడటానికి ఉపయోగపడుతుంది. మరోవైపు సిలికాన్ ఆయిల్ కండోమ్పై లూబ్రికెంట్గా పనిచేస్తుంది. ఈ రెండు పదార్థాల సరఫరాలో సమస్యలు రావడంతో ఉత్పత్తి ప్రక్రియ దెబ్బతింటోంది.
ఇక పాలీవినైల్ క్లోరైడ్ ఫాయిల్, అల్యూమినియం ఫాయిల్, పాలిమర్లు వంటి ప్యాకేజింగ్ సామగ్రి సరఫరాలో కూడా అంతరాయాలు ఏర్పడ్డాయి. రవాణా వ్యవస్థలో వచ్చిన ఇబ్బందులు, ధరల అస్థిరత కారణంగా ఆర్డర్ల అమలు ఆలస్యమవుతోంది. పరిశ్రమ వర్గాల అంచనా ప్రకారం అమ్మోనియా ధరలు 40–50 శాతం వరకు పెరిగే అవకాశం ఉంది. సిలికాన్ ఆయిల్ ధరల పెరుగుదల కూడా మార్కెట్లో అనిశ్చితిని పెంచుతోంది.
పశ్చిమ ఆసియా యుద్ధం కారణంగా ‘స్ట్రెయిట్ ఆఫ్ హార్ముజ్’ మార్గంలో వాణిజ్య రవాణా దెబ్బతింది. భారత్ తనకు అవసరమైన అన్హైడ్రస్ అమ్మోనియాలో దాదాపు 86 శాతం సౌదీ అరేబియా, ఖతార్, ఒమన్ వంటి దేశాల నుంచి దిగుమతి చేసుకుంటుంది. ఈ సరఫరాలో అంతరాయం కలగడంతో దేశీయ ఉత్పత్తిపై ప్రభావం పడుతోంది. సిలికాన్ ఆయిల్ కూడా ప్రధానంగా చైనా నుంచి దిగుమతి అవుతుండటంతో పరిస్థితి మరింత క్లిష్టంగా మారింది.
నిపుణుల ప్రకారం, ఈ పరిస్థితి కొనసాగితే కండోమ్ల సరఫరాలో కొరత ఏర్పడే ప్రమాదం ఉంది. ధరలు పెరిగితే ముఖ్యంగా తక్కువ ఆదాయం కలిగిన ప్రజలు గర్భనిరోధక సాధనాలను తక్కువగా వినియోగించే అవకాశం ఉంది. దీని వల్ల అవాంఛిత గర్భధారణలు, తల్లి-శిశు మరణాలు, లైంగిక వ్యాధుల వ్యాప్తి పెరిగే ప్రమాదం ఉందని హెచ్చరిస్తున్నారు.
‘పాప్యులేషన్ ఫౌండేషన్ ఆఫ్ ఇండియా’ ప్రతినిధుల ప్రకారం, గర్భనిరోధక సాధనాల ధరలు పెరగడం లేదా లభ్యత తగ్గడం వల్ల గ్రామీణ ప్రాంతాల మహిళలపై ఎక్కువ ప్రభావం పడుతుంది. కాబట్టి ప్రభుత్వం ముందస్తు చర్యలు తీసుకుని సరఫరా నిరంతరంగా కొనసాగేందుకు బలమైన పంపిణీ వ్యవస్థను ఏర్పాటు చేయాల్సిన అవసరం ఉందని సూచిస్తున్నారు.
Also Read: Suprem Court: ‘అత్యాచార బాధితుల పేర్లను తీర్పుల్లోనూ వాడొద్దు’
Condom Shortage: మొన్నటిదాకా గ్యాస్, పెట్రోల్.. ఇప్పుడు కండోమ్
