Andhra: ఆ స్నేహితులిద్దరూ ఎప్పుడూ కలిసే తిరుగుతుండేవారు. కష్టసుఖాలు పంచుకుంటూ, సరదాగా జీవితం గడిపే వారు. కానీ ఆ సరదానే వారిని మృత్యువుతో ముంచేసింది. ఈత కొట్టడానికి వెళ్లిన వారు ఆఖరుకు తిరిగి రాలేకపోయారు. ఈ దుర్ఘటన సోమవారం నాడు యాదాద్రి భువనగిరి జిల్లా మోగులూరు గ్రామంలో చోటుచేసుకుంది.
పోలీసుల సమాచారం ప్రకారం, గ్రామానికి చెందిన షేక్ ఖుద్దూస్ (24), షేక్ ఫారూఖ్ (17) మంచి మిత్రులు. ఖుద్దూస్ స్థానికంగా చిన్నపనులు చేసుకుంటూ కుటుంబానికి తోడ్పడుతుండగా, ఫారూఖ్ కంచికచర్లలోని ఒక ప్రైవేటు కళాశాలలో ఇంటర్ చదువుతున్నాడు. ఈ ఇద్దరూ మధ్యాహ్నం గ్రామ సమీపంలోని మునేటికి ఈతకు వెళ్లారు. అయితే ప్రమాదవశాత్తు నీటిలో మునిగిపోయి గల్లంతయ్యారు.
కొంతసేపు గడిచినా వారిద్దరూ బయటకు రాకపోవడంతో అనుమానం వచ్చిన స్థానికులు, ఏటి ఒడ్డున వారి దుస్తులు చూసి బంధువులకు సమాచారం అందించారు. వెంటనే కుటుంబ సభ్యులు అక్కడికి చేరుకుని పోలీసులకు వివరాలు తెలిపారు. పోలీసులు, గ్రామస్తుల సహాయంతో మునేటిలో గాలింపు చర్యలు చేపట్టారు. గంటల తరబడి సాగిన అన్వేషణలో చివరకు ఇద్దరి మృతదేహాలు బయటకు తీసారు.
ఈ ఘటనతో గ్రామంలో తీవ్ర విషాదం నెలకొంది. ఒకేసారి ఇద్దరు స్నేహితుల మృతి తల్లిదండ్రులు, కుటుంబ సభ్యులను కన్నీటి పర్యంతం చేసింది. యువకులు అల్పవయసులోనే ఇలాగే ప్రాణాలు కోల్పోవడంతో గ్రామస్తులు తీవ్ర విచారాన్ని వ్యక్తం చేస్తున్నారు. పోలీసులు కేసు నమోదు చేసి దర్యాప్తు ప్రారంభించారు.
