Instagram: ఇన్స్టాగ్రామ్లో చిన్న వయస్కుల భద్రతను బలోపేతం చేసేందుకు మెటా సంస్థ కీలక నిర్ణయం తీసుకుంది. ఇకపై సినిమాల తరహాలోనే PG-13 రేటింగ్ మార్గదర్శకాల ఆధారంగా టీనేజ్ యూజర్లకు కంటెంట్ పరిమితులు (రెస్ట్రిక్షన్లు) విధించనుంది.
మెటా ప్రకారం, 18 ఏళ్లలోపు యూజర్లు ఆటోమేటిక్గా “13+ కేటగిరీ” సెట్టింగ్లో ఉంచబడతారు. ఈ సెట్టింగ్ను పేరెంట్స్ అనుమతి లేకుండా పిల్లలు మార్చలేరు. అంటే, వారికి డ్రగ్స్ వాడకం, హింసాత్మక, అడల్ట్ కంటెంట్ వంటి అంశాలు కనిపించవు.
ఇటీవల 18 ఏళ్ల లోపు యూజర్ల భద్రత సరైన రీతిలో ఉండకపోవడంపై సోషల్ మీడియా సంస్థలు విమర్శలకు గురవుతున్న నేపథ్యంలో ఈ నిర్ణయం తీసుకున్నట్టు మెటా తెలిపింది. ఇకపై ఇన్స్టాగ్రామ్లో టీనేజర్ల ఖాతాలు PG-13 సినిమా రేటింగ్ విధానాల ప్రకారం నియంత్రించబడతాయి.
గత ఆగస్టులో రాయిటర్స్ నివేదికలో, మెటా సంస్థలోని చాట్బాట్లు “శృంగారభరిత” లేదా “ఇంద్రియ సంబంధిత” సంభాషణల్లో పాల్గొనడం వంటి అంశాలు బయటపడటంతో కంపెనీ తీవ్ర విమర్శలను ఎదుర్కొంది. దాంతో, సంస్థ తన AI ఉత్పత్తుల్లో కొత్త భద్రతా చర్యలు తీసుకువచ్చింది.
మెటా ప్రకారం, ఇకపై స్వీయహాని లేదా ఆత్మహత్యకు సంబంధించిన సంభాషణలను గుర్తించి అడ్డుకునేలా శిక్షణా వ్యవస్థలు (ట్రైనింగ్ మెకానిజం) అమలు చేస్తారు. అదేవిధంగా, టీనేజర్ల వయసును ఖచ్చితంగా గుర్తించేందుకు ఏజ్ ఎస్టిమేషన్ టెక్నాలజీ ఉపయోగిస్తామని వెల్లడించింది — వారు పెద్దలమని చెప్పినా, తగిన రక్షణలు కొనసాగుతాయని తెలిపింది.
ఈ మార్పులు ఇన్స్టాగ్రామ్ను టీనేజర్లకు సురక్షితమైన మరియు బాధ్యతాయుతమైన సోషల్ ప్లాట్ఫారమ్గా మార్చడానికే తీసుకున్న చర్యలని మెటా స్పష్టం చేసింది.
