Diwali: మన దేశంలో దీపావళి పండుగను దీపాల పండుగగా జరుపుకుంటే, నేపాల్లో ఈ పండుగకు ఒక ప్రత్యేక రూపం ఉంటుంది. అక్కడ దీపావళిని ‘తిహర్’ పేరుతో ఐదు రోజుల పాటు ఘనంగా జరుపుకుంటారు. ఈ ఐదు రోజుల పండుగలో ప్రతి రోజుకీ ప్రత్యేక ప్రాధాన్యం ఉంటుంది. అందులో రెండో రోజు పూర్తిగా శునకాలకు అంకితం చేయబడింది.
ఆ రోజు మనిషికి విశ్వాసంగా, కాపాడే స్నేహితుల్లా ఉండే శునకాలను పూజిస్తారు. వీధి కుక్కలైనా, పెంపుడు కుక్కలైనా తేడా లేకుండా ప్రతి కుక్కను సత్కరించడం అక్కడి సంప్రదాయం. వాటికి పూలమాలలు వేసి, నుదుటిపై తిలకం పెట్టి, ప్రత్యేక ఆహారం అందిస్తారు.
View this post on Instagram
ఈ పూజను ‘కుక్కా తిహార్’ అని కూడా పిలుస్తారు. దీని ద్వారా నేపాలీ ప్రజలు శునకాల విశ్వాసం, నిబద్ధతకు కృతజ్ఞతలు తెలియజేస్తారు. కేవలం ఇంట్లో పెంచే జంతువులకే కాకుండా వీధుల్లో తిరిగే కుక్కలను కూడా గౌరవంగా చూసే ఆ ఆచారం ప్రపంచానికి ఒక అందమైన సందేశం ఇస్తుంది.
ఈ విధంగా తిహర్ పండుగలో శునక పూజా సంప్రదాయం నేపాలీ ప్రజల జంతు ప్రేమను, కృతజ్ఞత భావాన్ని ప్రతిబింబిస్తుంది. ప్రతి జీవిని గౌరవించే భావనతో ఆ పండుగను వారు నిజమైన స్ఫూర్తిగా జరుపుకుంటారు.
