Pregnancy: కాలం మారింది. చదువుకున్న తర్వాత ఆడపిల్లలు ఉద్యోగాల్లో స్థిరపడుతున్నారు. ఉద్యోగంలో కొత్తగా చేరినందున పెళ్లిని, పిల్లల్ని ఆలస్యంగా చేసుకోవాలనే ఆలోచన పెరుగుతోంది. త్వరగా పెళ్లి చేసుకున్నవారే అయినా, పిల్లల విషయానికి వస్తే లేట్గా ప్లాన్ చేస్తున్నారు. కానీ వైద్య పరిశోధనలు చెబుతున్నది ఒక్కటే—పిల్లలు ఆరోగ్యంగా పుట్టాలంటే సరైన వయసులోనే కనడం మంచిది. ఈరోజుల్లో ఉద్యోగాల్లో ఉన్న మహిళలు ఎక్కువగా 35 ఏళ్ల తర్వాతే గర్భధారణను ఆలోచిస్తున్న tend చూస్తున్నాం.
సరైన వయసు ఎప్పుడు?
ఆడవారిలో ఆరోగ్యకరమైన అండాలు, గర్భధారణకు అనువైన పరిస్థితులు 21 ఏళ్ల తర్వాతే బాగా ఉంటాయి. కానీ 25 నుంచి 30 ఏళ్ల మధ్య గర్భధారణ ఉత్తమం అని వైద్యులు చెబుతున్నారు. ఈ వయసులో అండాలు పరిపూర్ణంగా ఉంటాయి, పుట్టే పిల్లలు కూడా ఆరోగ్యంగా ఉండే అవకాశం ఎక్కువ. 30 దాటిన తర్వాత మహిళల్లో హైపర్టెన్షన్, డయాబెటిస్ వంటి సమస్యలు పెరిగి గర్భధారణ కొంచెం క్లిష్టమవుతుంది. 35 దాటితే అయితే గర్భం ‘హై రిస్క్’ కేటగిరీలోకి వెళుతుంది. అందుకే పెళ్లైన జంటలు 30లోపు పిల్లల్ని కనాలని నిపుణుల సూచన.
ఎగ్ ఫ్రీజింగ్ ఒక ఆప్షన్
కెరీర్, ఆర్థిక స్థిరత్వం వంటి కారణాలతో పిల్లల్ని ఆలస్యంగా ప్లాన్ చేయాలనుకునే మహిళలకు ‘ఎగ్ ఫ్రీజింగ్’ మంచి ఎంపిక. 30 ఏళ్లలోపు తమ ఆరోగ్యకరమైన అండాలను నిల్వ ఉంచుకుంటే, భవిష్యత్తులో సులభంగా గర్భధారణ ప్రయత్నాలు చేయవచ్చు. ఫెర్టిలిటీ వైద్యులను సంప్రదిస్తే ఎగ్, స్పెర్మ్ ఫ్రీజింగ్ గురించి పూర్తి వివరాలు అందిస్తారు.
లేటుగా ప్లాన్ చేస్తే సమస్యలే ఎక్కువ
30 ఏళ్లలోపు మహిళల్లో ప్రసవం సాధారణంగా సులభంగా జరుగుతుంది. ప్రమాదాలు తక్కువ. కానీ 30 తరువాత వివిధ సమస్యలు రావచ్చు. మరీ 35 దాటితే అండోత్పత్తి తగ్గిపోవడం, అండాల నాణ్యత తగ్గడం, గర్భం నిలవకపోవడం, బిడ్డలో సమస్యలు రావడం వంటి అవకాశాలు పెరుగుతాయి.
అందుకే ఆరోగ్యకరమైన గర్భధారణ కోసం సరైన వయసులో కుటుంబ విస్తరణపై దృష్టి పెట్టాలని వైద్యులు సూచిస్తున్నారు.
