Sea Water: మన వంటల్లో ఉప్పు ఎంతో ముఖ్యమైన పదార్థం. ఈ ఉప్పు ఎక్కువగా సముద్రం నుంచే తయారవుతుంది. కానీ ఒక సందేహం చాలా మందికి వస్తుంది — నదుల నీరు తియ్యగా ఉంటే, ఆ నీరు సముద్రంలో కలిసిన తర్వాత ఎలా ఉప్పగా మారుతుంది? అసలు సముద్రపు నీరు ఎందుకు ఉప్పగా ఉంటుంది? దీనికి శాస్త్రీయ కారణాలు ఉన్నాయి.
లక్షల సంవత్సరాలుగా భూమిపై ఉన్న రాళ్లు, మట్టిలోని ఖనిజాలు వర్షపు నీటి ప్రభావంతో నెమ్మదిగా కరిగిపోతుంటాయి. వర్షపు నీటిలో స్వల్ప ఆమ్లత్వం ఉండటంతో రాళ్లలోని సోడియం, క్లోరైడ్, మెగ్నీషియం, సల్ఫేట్ వంటి ఖనిజాలు అయాన్ల రూపంలో నీటిలో కలుస్తాయి. ఈ నీరు ప్రవాహాలుగా, నదులుగా మారి చివరికి సముద్రంలోకి చేరుతుంది. ఇలా ప్రతి రోజు నదులు తీసుకువచ్చే చిన్నచిన్న ఖనిజాలే వేల, లక్షల సంవత్సరాల్లో సముద్రంలో భారీగా పేరుకుపోయాయి. అందుకే సముద్రపు నీరు ఉప్పగా మారింది.
ఇంకా సముద్రంలోని లవణాలకు మరో ముఖ్యమైన మూలం సముద్ర అడుగున జరిగే జలఉష్ణ ప్రక్రియలు, అగ్నిపర్వత చర్యలు. సముద్రపు అడుగున ఉన్న పగుళ్లలోకి నీరు చొచ్చుకెళ్లి, మాగ్మా వేడి వల్ల మరింత వేడెక్కుతుంది. ఆ వేడి నీరు చుట్టుపక్కల రాళ్లలోని ఇనుము, జింక్, రాగి వంటి లోహాలు, ఇతర ఖనిజాలను కరిగించి తిరిగి సముద్రంలోకి తీసుకువస్తుంది. అదేవిధంగా నీటి అడుగున అగ్నిపర్వత విస్ఫోటనాలు కూడా నేరుగా ఖనిజాలను సముద్రంలోకి విడుదల చేస్తాయి.
సముద్రపు నీటిలో ప్రధానంగా సోడియం, క్లోరైడ్ అయాన్లు ఎక్కువగా ఉంటాయి. ఇవే సాధారణ ఉప్పు యొక్క ప్రధాన భాగాలు. మొత్తం కరిగిన ఖనిజాల్లో దాదాపు 85 శాతం వీటివే. సాధారణంగా సముద్రపు నీటిలో సగటు లవణీయత సుమారు 3.5% ఉంటుంది, అంటే వెయ్యి గ్రాముల నీటిలో సుమారు 35 గ్రాముల లవణాలు ఉంటాయి. అందుకే సముద్రపు నీరు మంచినీటి కంటే కొంచెం ఎక్కువ దట్టంగా ఉంటుంది.
కొన్ని ఖనిజాలను సముద్ర జీవులు ఉపయోగించుకున్నా, సోడియం, క్లోరైడ్ వంటి లవణాలు మాత్రం ఎక్కువగా పేరుకుపోతూ ఉంటాయి. పైగా సముద్రపు నీరు ఆవిరైపోతే నీరు మాత్రమే పైకి ఎగిరిపోతుంది, కానీ ఉప్పు అక్కడే మిగిలిపోతుంది. దీంతో కాలక్రమేణా లవణీయత మరింత పెరుగుతుంది. ప్రపంచంలోని వివిధ సముద్రాల్లో లవణీయత స్థాయి వాతావరణం, వర్షపాతం, ఉష్ణోగ్రతల ఆధారంగా మారుతూ ఉంటుంది.
