Cold: చలికాలంలో దగ్గు, జలుబు చాలా సామాన్యంగా కనిపించే సమస్యలు. కొన్ని సందర్భాల్లో ఇవి తగ్గిన తర్వాత గొంతు బొంగురుగా మారడం, స్వరం భారంగా వినిపించడం, మాట్లాడేటప్పుడు ఇబ్బంది పడటం వంటి సమస్యలు వస్తాయి. దగ్గు సమయంలో గొంతుపై అధిక ఒత్తిడి, వైరల్ ప్రభావం లేదా గొంతులో వాపు ఈ సమస్యకు ముఖ్య కారణాలు.
ఈ పరిస్థితి తీవ్రమైనదిగా ఉండకపోయినా అసౌకర్యాన్ని మాత్రం కలిగిస్తుంది. రోజువారీ పనులపైనా ప్రభావం చూపుతుంది. ఇలాంటి సమయంలో మందులు తీసుకుంటే ఉపశమనం లభించినా, ఇంటి చిట్కాలు (హోం రెమెడీస్) త్వరగా పనిచేయడంతో పాటు దుష్ప్రభావాలు లేకుండా ఉండటం ఒక అదనపు ప్రయోజనం.
గొంతు వాపు, బొంగురుతనం తగ్గి స్వరం మామూలు స్థితికి రావడానికి ఈ క్రింది ఇంటి నివారణలు చాలా ఉపయోగకరంగా ఉంటాయి:
1. గోరువెచ్చని నీటితో పుక్కిలించటం
ఒక గ్లాసు గోరువెచ్చని నీటిలో అర టీస్పూన్ ఉప్పు కలిపి రోజుకు 2-3 సార్లు పుక్కిలిస్తే గొంతు వాపు తగ్గి, గొంతు శుభ్రంగా ఉంటుంది. స్వరం భారంగా ఉన్నప్పుడు ఇది చాలా ఉపయుక్తం.
2. అల్లం – తేనె
తాజా అల్లం రసం తీసి అందులో తేనె కలిపి రోజుకు రెండుమూడు సార్లు తీసుకోవాలి. అల్లం యాంటీ ఇన్ఫ్లమేటరీ గుణాలు ఉన్నందున గొంతు వాపు తగ్గడంలో సహాయపడుతుంది.
3. పసుపు పాలు
రాత్రి నిద్రకు ముందుగా గోరువెచ్చని పాలలో అర టీస్పూన్ పసుపు కలిపి తాగితే గొంతు సమస్యలు తగ్గుతాయి. పసుపులో ఉన్న యాంటీసెప్టిక్, హీలింగ్ గుణాలు గొంతును శుభ్రపరచి స్వరాన్ని మెరుగుపరుస్తాయి.
4. ఆవిరి పట్టడం
వేడి నీటిలో కొద్దిగా యూకలిప్టస్ నూనె వేసి, తలను టవల్తో కప్పుకుని 5-10 నిమిషాలు ఆవిరి పట్టండి. ఇది గొంతులో ఉన్న ఇబ్బందిని తగ్గించడమే కాకుండా గొంతు నొప్పి మరియు బ్లాకేజ్ను కూడా తగ్గిస్తుంది.
5. తులసి టీ
8-10 తులసి ఆకులను నీటిలో వేసి మరిగించి, తరువాత అందులో నిమ్మరసం, తేనె వేసి టీలా తాగాలి. ఇది గొంతు వాపును తగ్గించి బొంగురు గొంతును సర్దుకునేలా చేస్తుంది. శీతాకాలంలో ఇది ఇతర సమస్యలపైనా ఉపశమనం ఇస్తుంది.
